MZP chuan an ngenna ngai pawimawh loa party pakhatin candidate atana hnam dang pasal nei an dah an duh loh lantir nan vawiinah ‘Hnam humhimna kawngzawh’ an buatsaih dawn.
MZP executive committee nimin tlaia thukhawm chuan Congress party-in Lunglei South biala ding tura hnam dang pasal nei, Meriam L. Hrangchal an dah lui chu an duh lo hle a, Mizo hnam humhim zel a nih theih nan leh hnam dang pasal nei candidate duh loh lantir nan vawiinah ‘Hnam humhimna kawngzawh’ buatsaih an rel a ni.
MZP chuan Meriam L. Hrangchal pasal chu Dipen Zoliana a nih thu sawiin, Dipen Zoliana pa chu Niraj Singh a ni tih leh a nu chu Kawlhmingliani, Gorkhali dik tak a ni a, “Mizo-ah pawm theih a ni lo,” an ti.
Mizo hnam dan, The Mizo Customary Law Published by Law & Judicial Department Govt. of Mizoram Bung 3:74-na chuan, “…Mizo hmeichhiain hnam dang pasal a neih chuan hnam dang chhungkuaah a luta ngaih a ni,” an ti a, Mizo hmeichhia hnam dang neite chu hnam dang chhungkuaah an ngai nghet tlat a, Mizo mipui aiawha ram rorelna sang bera thu turin a pawm thei lo tih te, Mizo nihna hi Mizorama awm rei tawh avanga inpek chia an ngai lo tih an tar lang.
MZP President H. Lalthianghlima chuan Mizoram political party-te chu MLA inthlanpui neih turah hnam dang pasal nei emaw, hnam dang candidate-ah dah lo turin tum hnih lai an lo ngen tawh thu te, party thenkhatin an thu an zawm laiin Congress party erawhin an thu zah loin candidate-ah hnam dang pasal nei an dah lui tih leh an rilru a na hle tih a sawi a, kawng zawh an huaihawt bakah a tlin lohna turin kawng hrang hrangin hma an la dawn tih a sawi.
H. Lalthianghlima chuan ram leh hnam hum himna tura an hmalakna chu thlawp turin Mizo mipui a sawm a, hnam dang pasal nei candidate-a dahtu Congress party chu vote lo ngam turin Mizoram mipui an ngen tih a sawi.