Ei tur, tui leh damdawi thil phurtu truck 20 chuang chuan Gaza luhtir tum mek a ni a, ni reilo te hnuah chuan an luh theih beisei a ni.
Israel chuan October 7-a Hamas helhoten an beih thut atang khan Gaza-in electricity, tui lakna tam zawk leh ei leh in tur leh damdawi a chawk luhna kawng zawng zawng an dangchat mek.
Hemi ni atang hian Gaza-a mihring maktaduai 2.1 chuang chengte chuan ni tin mamawh an tlachham nghal titih a ni.
Tanpuitu pawl liante chuan puihna thilte hi tuipuiah tal thlak an tum tih an sawi.
“UN chuan Gaza-a cheng maktaduai tel hian an mamawh zualpui atan truck phur 100 tal rang takin an mamawh tiin a tar lang,” tiin Norwegian Refugee Council hotu, Shaina Low chuan BBC hnenah a sawi.
United Nations Relief & Works Agency (UNRWA) Commissioner-General Philippe Lazzarini pawhin indona a chhuah hma kha chuan ni khatah Gaza puihna tur thil leh tuialhthei leh mamdawh dang phur truck 500 vel a lut ziah niin a sawi ve bawk.
Amman-a UN hnuaia pawl thupuangtu, Juliette Touma-i chuan indo hma kha chuan Gaza-a mihring maktaduai 1.2 zette chu UNRWA pek ei tur ringa an khawsak thu a sawi.
“Gaza Strip-ah hian a mi chengte hi an rethei tak zet a. Indona a chhuah hma pawh khan an dinhmun hi a khawngaihthlak sa tawh a, chu chu tunah chuan chhiatna lian takah a chang zui bawk,” a ti.
Nilaini khan US President Joe Biden leh Egypt President Abdul Fattah al-Sisi te chu inbiain Egypt-a Rafah crossing atanga puihna pek luh thei chin bituk (limit) siamin phurh luhna turin an inrem.
Biden-a hian reilo te Israel a tlawh hnuah al-Sisi-a hi a be zui a ni.
Israeli Prime Minister Benjamin Netanyahu pawhin Nilaini vek khan Israel chuan Gaza chhim lama civil mite puihna tur Egypt atanga phurh luhte chu an ‘tibuai dawn lo’ tih a sawi bawk.
Hetih rual hian a sorkar chuan ei tur, tui leh damdawi mamawh pek luh chauh a phalsak a, tuialhthei leh ni tin mamawh dang phurh luh chu a pawmpui chuang lo.
UN chuan report a siamah Gaza-ah hian tuialhthei mamawhna a sang tak zet niin a tar lang a, a awm loh chuan tuiah harsatna a awm phah nghal a, thlaiin an tuar a, tui pump khawl pawhin hna a thawk rei thei chuang lo niin an sawi.
Lazzarini chuan tuialhthei hi thawn luh a nih loh chuan tui tam zawk phur truck tal luhtir an mamawh thu a sawi.