New Zealand in ICC Men’s Cricket World Cup a an chetthat tluan chhunzawmin chungnung takin Afghanistan an hneh a. A zawnin vawi li an chak tawh.
Chennai a MA Chidambaram Stadium a inkhelah Black Caps hi vuak hmasak tir an ni a. Run 109 an siamin wicket khat chauh an hloh a, mahse run 110 an pelh hma in wicket thum an hloh belh avangin a laihawlah an talbuai dawn niin a lang hman.
Nimahsela Glenn Phillips leh captain Tom Latham-te inkawpin an ram chhanchhuak a. Run 144 partnership neiin over 50 chhungin run 288 an siam a, wicket 9 an hloh.
Phillips-a’n run 71 siamin Latham-a’n run 68 a siam a. Naveen-ul-Haq chuan over 48-naah a vawm out ve ve. New Zealand tan hian an innings tawp lam a ball 12 atanga run 25 vaw chhuaktu Mark Chapman pawh a pawimawh.
Afghanistan in England laka hnehna an chan hnuah an chetthat chhunzawm thei an ni a, amaherawhchu mimal tihsual leh fielding-ah an felfai loh an tuar.
New Zealand laka catch out ni thei tur tum nga hun tha an bawhpelh a. Stumping remchang nei mahse an chhawr tangkai lova. New Zealand opener Will Young chu run khat chauh a siam laia catch out thei nimahsela an huntha an hloh hnuah half century a siam bawk.
Ball nen New Zealand an che tha hle thung a. Trent Boult leh Matt Henry ten bul tanin run tlemte chauh pe in Afghan batsman-te an tihthaih fova. An captain Hashmatullah Shahidi wicket a tlak hnuah talbuai zualin New Zealand tan wicket thum ve ve la Mitchell Santner leh Lockie Ferguson ten a tawp an khar tha hle.
New Zealand captain Tom Latham chuan, “A tirah kan tluk sual mai a hlauhawm hman viau hnuah kan kheltha hle in ka hria. World Cup inbuatsaihnaah kan che tha a, kha kha kan la chhawm tluang zel.”
“India leh Australia lakah fiahna hautak a la awm dawn a, mahse kan inrintawkna a sang a, chhunzawm zel kan tum ang.” tiin inkhel zawhah a sawi.
- Match Summary
New Zealand 288/6 (50 Overs)
Tom Latham 68 (74)
Glenn Phillips 71 (80)
Naveen-ul-Haq 2/48 (8)
Azmatullah Omarzai 2/56 (7)
Afghanistan 139(34.4 Overs)
Rahmat Shah 36 (62)
Azmatullah Omarzai 27 (32)
Lockie Ferguson3/19 (7)
Mitchell Santner3/39 (7.4)