Brazil leh Al-Hilal forward Neymar chuan a khupah hliam na a neih avangin zai a ngai dawn a, a chawl rei dawn.
Kum 31 mi hi Thawhlehni khan Brazil leh Uruguay inkhelah a inhliam a. Inkhel chhunzawm thei lovin lakchhuah niin a khup hliam hi enfiah a nih hnuah anterior cruciate ligament leh meniscus a ti na tih hmuh a ni a. Zai a ngai dawn.
Montevideo a 2026 World Cup qualifier inkhelah hian ball inchuha Uruguay player nen an innek hnuah rap sualin a inti na a ni.
Neymar hi a chawlh chhung tur hriat ni lo mahse a hliam hi a nat avangin kir leh thuai thei a ni dawn lova. ACL hliam hi infiamna hrang hrangah infiammiten an chawlh rei phahna thin a ni a, football bikah chuan thla riat atanga thla 10 vel an chawlhpui a ni thin.
Neymar chuan, “Ka tan hun duhawm lo tak a ni a, ka hun tawn zingah chuan la hreawm ber pawl a ni ang. Mahse ka rilru a paukhauh a, ka hneh thei tih ka hria. Ka chhungkhatte leh thianhnaite ka mamawh zual dawn a ni.” tiin social media kaltlangin a hliam chungchang hi a sawi.
Brazilian Football Confederation president Ednaldo Rodrigues chuan, “Brazil leh khawvel football in Neymar dam that hi a mamawh a, football hi a inkhelh hian khelmual chhungah a hausa zawk a ni.” tiin a sawi ve bawk.
Brazil mipa team tana goal khung hnem ber Neymar hi tun nipuiah khan Paris St-Germain atangin Saudi Arabia lamah a insawn a. Tunhnai kum engemaw zah chhungin hliamin a tlakbuak nasat avangin a inkhel tam lo.
Nikum khan Qatar World Cup-ah match hnih a khel thei lova, PSG tana a season hnuhnung pahnihah thla engemaw zat a chawlh a nei nual bawk.