Tlangzarh atanga chawlhkar ruk a liam meuh chuan ‘Jawan’ film-in hnial lam pan hret hret tura mi tam tak ngaihdan chu phetthlak ni zelin, ni 40-naah cheng nuai 60 vel lalutin, ni 41-naah cheng vaibelchhe 77 velah a kai lehnghal a, tualchhunga sum lakluh belhkhawm cheng vaibelchhe 637 a tling ta.
Heti ang zel a nih chuan Shah Rukh Khan hian a film, ‘Pathaan’ record breaak turin cheng vaibelchhe 5 bak a mamawh tawh lo tihna a ni a, chuti ang zelin ‘Jawan’ sum lakluh hi film thar dangte tan pawha cho ngam lo hial ni thei dinhmunah ding nghalin, a record break thei tur chuan a harsa viau tawh tura ngaih a ni.
Shah Rukh Khan hian covid hripui len hma hret khan film hnuhnung ber tichhuakin, a flop chiang hle a. Hripui lengin a umzui deuh mai bawk nen, film thar nena chetthat leh ‘comeback’ ropui tak neih tur atan pawh thil harsa leh huhphurhawm tak a tling.
Amaherawhchu, mak tak maiin, kumin kumtir khan ‘Pathaan’ chuan Bollywood mai ni lo, lemchan khawvel pumhuap ang pawhin a rawn che ropui miah miah hle a, sum siamna factory a ni ringawt mai. A hnu deuh maiah ‘Jawan’-in a rawn umzui leh mai bawk a, hei pawh hian record ropui leh duhawm a rawn siam chho zel dawn ni te pawhin a lang.