Inthlan hmachhawn turin kan inpuahchah mek. Political party te pawhin thapui an thawh tan ta. Party hrang hrang ten an party election manifesto pawh an chhuah ta hlawm a. Party lian pathum Zpm, mnf leh congress chuan an election manifesto an puangchhuak ta.
Election manifesto hi sawrkarna an chana an sawrkar hnathawh turte puan lawkna a ni a. An tihhlawhtlin tur thilte an tiamna a ni. Eng lamah nge ke an pen dawn, khawi laiah nge an bun nghal chat ang tih an puanna a ni.
Party in manifesto an nei a, an Mla candidate zawng zawngin an manifesto pawh hi an hriat reng nan an thinlungah an vawng( by heart) tura ngaih a ni. Mahni party election manifesto pawh hrechiang mang lo Mla candidate te kan lo vote palh hlauh ang tih a hlauhawma. Mipui pawhin an manifesto te lo zawt chiang thlap thlap thin ila a tha khawp mai.
Election manifesto hi party te hian a hmingin an chhuah mai mai thin nia a lanna lai hi a awm a. Sawrkarna an chan tak veleha an theihnghilh zui ta mai emaw tih mai tur hian kan sawrkarte an awm tawh thin. An sawrkar hunchhung a lo tawp dawn tep tawh hnu a, an elction manifesto nena han chhuahchhal dawl sawrkar ang hi kan mamawh ber niin a lang a. Tuna kan sawrkar pawh hi han chhal dawn ila sawi mam tur leh tih loh avanga phatna an zawn nasat a ngai ve khawp ang. Kan sawrkar hi an thutiam berah an rinawm loh a, an hlawhtlin lohah phatna zawng kual an nih chuan chu ngei chu sawrkarna pek nawn ngam loh chu an ni ang.
Political Party ten an manifesto an tihlawhtling lo tia kan sawi hi a chhan hrang hrang zingah mipui lam pawh hi kan kan in enlet tel ve a pawimawh bawk. Kan sawrkarin an manifesto an tihlawhtling nge an ngaihsak zui lo tih hre tur chuan tuna an zawrh lai hian kan lo zirchiang tur a ni a. Kan zirchian loh chuan sawrkarna chang apiang an duh dan danin an kal leh ang a. A tuartu chu mipui bawk kan ni leh dawn. An manifesto hi tihlawhtling se kan ram tan, kan khaw tan, kan veng tan leh kan chhungkaw tan a tha dawn em tih kan zirchiang ang a. Chumi hmang chuan vote pawh kan thlak ang a. Sawrkar tha kan vote chhuah ngei a rinawm. Hemi party candidate hi ka hmelhriat a ni, thla ka lakpui tawh tih vela vote thlak hi a him lova. Kan ngaihtuahna senga a tha ber vote turin inbuatsaih ila. Sawrkarna an lo chan pawhin kan zirchianna hmang ngei khan kan sawrkar chu kar nghal ngar mai ila kan thatpui ngei a rinawm e.