- Mahmuaka Chhakchhuak
Oct. 9, 2023 tlai lamah chuan Mizoram i rawn kal tur hi ka lo hre tawh a, Aizawl chauh niloa Lunglei leilung i rawn rah dawn thlengin ka lo hre tawh a, hre hmasa ve tak ka ni awm e. I chanchin hi ka ngaihven hrim hrim vang erawh a ni kher chuang lo a, i chanchin hre turin ka awmna hmunin a zir vang pawh a ni ang e.
Tichuan, Lunglei leilung i rawn rap dawn tih ka hriat chuan eng emaw ti taka phurna neiin Delhi tlanga Central hruaitu emaw Party hruaitu hraw tak takte ang lo takin nang erawh chuan Mizo mipui ngainat i hlawh tlat avangin Mizo thalaite tan chuan thil lawmawm tak a nih pawh ka lo ring lawk bawk a. Nang zawng boruak hi i nei ve hrim hrim a, kum 53 mi chauh ila niin i vanglai tak tur a ni bawk a, a lehlam takah chuan i hringnun hi khirh chang tam mahsela i awh-awm ngawt mai. Sawi loh theih loh chu i pa, Rajiv Gandhi mawlh kha kan sawi bang thei lo. Mizo mipuite min hmangaihna leh kan tana a hnathawh ropui tak takte kha kan thinlungah hian kan vawng reng a, kan theihnghilh tawh ngai hek lo ang. Kum 47 mi chauh nia hmelma kuta a boral ta mai erawh kan mittui hi ala hul tak tak thei lo a, i pi, Indira Gandhi lah hmelma kuta lo boral a nih bawk avangin nang atan ngei pawh zalen taka nun hman hi a har ve ngawtin kan rin pui che a ni.
May 21, 1991 ni tak a nih kha: Rajiv Gandhi chuan Car hmangin Sriperumbudur a pan a, zan dar 10;00-ah chiah a thleng a. Dar 10;10 a han ri leh chiah tihah chuan thusawi turin dawhkan lam a pan a, hetih lai hian pangparthi awrhtir tura Party mi pawimawh tak tak lo awm zingah chuan pangparthi awrh tir paha amah thihchilh tumtu Dhanu ngei pawh chu pangparthi kengin alo awm ve reng tawh bawk a. Dhanu hian a tih tur chu a hrechiang viau nain a hmelah lungngaihna ruk tak a nei a ni tih alang thei hial nghe nghe nain a koa tlu tawh chu tha taka hlen ngei a tum thung a. Security lam pawh chu an fimkhur viau nain mipui lamin an chim buai avang chuan an fimkhur seng bik lo a, Dhanu ngei pawh hi nawr sawn zingah a tel hman tep nghe nghe a ni. Amaherawhchu Rajiv-a ber hian chutia mipui, amah lawm avanga rawn kalkhawmte chu ‘Mitin khan pangparthi chu a indawt khan awrh tir phawt mai teh u’ tia a rawn auh takah chuan Dhanu ngei pawh chuan a inruahmanna ang chiahin pangparthi chu a awrh tir ve thei dawn ta.
Rajiv Gandhi chu pangparthi awrh tir pah chuan muangchangin a rawn tawlh phei zel a, Dhanu zawn a rawn thlen chuan a ding chat a, Dhanu chuan pangparthi chu alo awrh tir a, a awrh tir zo, zahna chibai buk tuma Rajiv Gandhi ke deh tuma a kun chu Rajiv chuan ‘a ngai lo e’ tiin chawikan a lo tum a, chutia an pahniha an kunhniam lai tak chuan a kawnga Bomb pai hmehpuahna trigger chu a hmet ta a, ring lutuk tak maiin Bomb chu a puak ta a, eng nasa takin a chhuak nghal bawk a, a hmunah mi 14 an boralin mi 43 laiin hliam an tuar bawk a. Boral zingah hian Rajiv Gandhi hi telin a taksa ngei pawh chu chhar khawm hleihtheih loh khawpin a darh nasa tih kha vawiin thleng hian kan la theihnghilh lo.
Oct. 16, 2023 chawhnu lamah Helicopter hmangin Aizawl i rawn thleng a, Thuampui Helipad atanga Chanmari kawn thlenga lirthei hmanga i kal hnua Chanmari kawn atanga Raj Bhavan hmar lam gate thlenga ke-a i rawn kal phei ta mai kha i pa zia chiah chiah niin Mizo mipuite in ngainatna thinlung intih lanna niin kan hria a, keini pawhin kan ngainat phah lehzual bawk che a ni. Hmelah i pa hmel ila put bawk avangin leh incheinaah pawh i pa ang deuh bawka ila rawn inchei zel bawk avangin kan thinlungah chuan i pa nen kan dah hrang thei lo che u a, kan ngainatna che u pawh a ngai reng a ni tih nangmah ngei pawhin i hai kher awm lo e. Amaherawhchu venhimna lama Z-plus pek i nihna erawh chuan tlemin min ti bual deuh a, nangmah ngei pawhin i chet vel danah kha chuan chutianga venhimna chu hnawksak i ti ve deuh em aw kan ti bawk a.
Oct. 17, 2023 ni a rawn herchhuak leh a, Pu Hawla kianga tukthuan ei tura tualchhung Two Wheeler i han hmang maite kha i inngaihtlawmna a ni tih chu hrethiam tho mah ila Mizoram hi nuam i tiin i thla a ngam ve tawk iin kan hria a, kan ngainatna che a zual phah a, kan zinga awm hi nuam i ti ve tak tak niin kan rin phah bawk che a ni. Kan ram, India ram angah hi chuan kan hruaitute hi an intih lal thiam viaua kan hriat na karah nang meuhin khatianga tualchhung Two Wheeler i han hmang mai kha chu kan phu zawk a ni. Kumin April thla maia Delhi local Taxi Driver-in darkar khat aia rei mah tur Delhi khawpuia min phurh kual dan leh ka duh lohna hmuna min thlenpui dante ka han ngaihtuah phei chuan kan rilru a inang dawn lo ngawt mai ka ti lo thei lo a, i thlamuan dan tur ka hrethiam deuh ruak ruak a, ka lawmpui ngawt mai che. A dik chiah alawm, Mizo zingah chuan thlamuanna tur a awm reng bawk a ni.
Lunglei lam mawlh kha sawi tur a tam. Kum 1987 khan i rawn kal tawh niin kan hria a, i nu leh pa mai bakah i farnu Pryanka nen khan zan riak meuhin in rawn kal a ni awm a. Khatah khan zingah in unauin in lo leng chhuak a, tumah hrilh loa chhuak niin an sawi che u a, a dik em. Nangmahni vengtute chuan an zawng nasa che u a, children park bulah sawn an rawn hmu leh che u an tih kha tak tak a ni em. Tak tak a nih ngei pawh ka ring deuh, nitina Delhi boruak lum hrehawm tak leh venhimna khauh tak ata boruak thianghlim han dawn ve zauh kha chu thil chakawm tak tur a ni. Tichuan, Aizawl atangin Lungleiah hun hmang leh tura an sawi avangin Lungleiah chuan thlalakpui ngei che ka lo tum ru ran a. I hun hmanna hmun tur Tennis Court hmun hlui ngei pawh darkar hnih dawnin ka lo thlen khalh nghe nghe che a.
Kawmzawl Helipad atangin lirthei hmangin i rawn tlan a, lirthei dang engemawzatin an rawn zui bawk che a, chak takin a nih kha in rawn tlan ni. Zotlang in rawn thleng a, kawngsirah mipui, nu nau engemawzatin flag vai chungin an lo lawm che a nih kha. Ngawi rengin tlan pel la khang mite khan an dem hauh lo ang che. Chuti a nih loh pawhin ban vai chungin anmahni kha lawm la, an lawm em em tho ang, nimahsela nang erawh chuan tlan pelh emaw ban vai emaw duh tawk mai loin lirthei tlan lai chu i dintir a, kawngkhar hawngin i rawn chhuk a, kawngsira nangmah lo lawmtute i va chibai zet erawh kha chu kan ngainatna che hi ava han zual phah tak em. A bik takin flag keng chunga nangmah lo vaitu naupang i han chibai kha kan mitthlaah hian a reh tawh ngai lo ang. Rahul, i chevel hian nangmah veng himtute chu tibuai deuh mahsela mit ava hahdam tak em…..
Tennis Court-ah chuan mipui tana thut phalna chin tlar hmasa berah ka thu a. E, Lunglei lama venhimna khauh zia kha khauh tak a ni. Ka hriat danah phei chuan Inrinni daih tawhah khan a bik taka Security tura ruat (Vai dum tak tak ho) chuan Lunglei an rawn thleng tawhin chhun leh zan chawl loin hun an hmang tawh an ti a. Lungleia sorkar hruaitute leh a bik takin force lam pawh an inruahman nasa hle tih ka hria a, kan kiangah uniform ha mi eng emaw zat an awm chungin Inchhawng sang leh Saikuti Hall chung sangahte ngei chuan duty tir an ni bawk a, khati tak khan a ni maw Z-plus category hi buaipui alo ngaih ka tih phah hial. Tichuan, mipui tam takte chuan kan lo nghak ngat ngat che a, nisa tak hnuaiah a ni kha kan lo nghah che ni. Dar khat leh minute sawm hnihah chiah i rawn thleng a, i rawn thlen hma atang rengin thawm a awm tawh a, i rawn thlen phei chuan thawm a ring lehzual a.
Tlar hmasa bera thu ka ni bawk a, uluk takin ka lo thlir che a, i incheina leh i mitmeng thlengin chik takin a ni ka lo thlir che ni. Ka duh aiin i inthuam ho lam deuh hlek a; Kameez nalh tak haa bilh thlap turin ka beisei lo na chein i T. Shirt hak kha inhmeh ka ti che a, i kekawr hak kha a panga ipte lian tak awm chi niin ka rawn hmu bawk a, chutah Chapal pangngai tak ila rawn bun kha chu ka lo duhkhawp lo ang reng viau mai. Pheikhawp pum han bun zawk la kan lo ti a, smart deuh takin han inchei la kan lo ti ve mai mai a, nimahsela Rajiv-a fapa i ni miau a, kan ngainatna che erawh a kiam phah hauh chuang lo. I thusawi rik lam sawi ka tum rih lo a, i chevel reng reng kha a hmuhnawm ka ti a, i awmdan reng rengah khan chapona leh mit khamna tur engmah ka hmu lo. Thu i sawi zo, ka kianga thu mi pakhatin ‘Rahul, thla ka lakpui duh che’ tih paha kuta a rawn hui che khan i rawn kal mai ka lo ring tak taka ka lo inring ve hman khiau a sin.
Lirthei lam i pan a, i tan khan lirtheia luh ngawt pawh a harsa ngawt mai tiraw. Nangmah bawrtu kan hmeichhiate kha zakthei lo ti hauh lo la, an ngainat vang zawk che a ni tih kha i hriatthiam tho ka ring nain ka han hrilh hre ve hrim hrim hrim duh che. Congress Party Office chhungah, President room chhungah, a bik takin an luhpui che a, thlalakpui che tumin ka rawn zui lut nghal che a nih kha. Bathroom-a i luh zawk avangin kan lo nghak che a, khata lo nghaktu che mi tlemte zinga awm kha a harsat tehlul nen bathroom atangin i rawn chhuak a, lo selfie-pui che tumin ka lo kuah nghal che a, nang lahin ‘not selfie, not selfie’ tia ilo duh lo kha chu ka ngei lek lek mai che. Aizawl lamah le’m ZazawnPuii te’n thla an lakpui che a, an intihtheih tehluh nen nang nena kan thlalak dunna ka neih chhunah lah hian midang an lang tam si a, nimahsela ka lawm tho e.
Nang zawng, mi bik hi chu i va han ni tak em aw, lo ngawi tak rawh, i Prime Minister nih hun hi a hla mawlhin ka ring lo a ni. Chutih hunah chuan Mizoram hi rawn kal leh ngei turin ka duh che a, uluk takin thla ka lakpui theih tawh ngei che pawh ka beisei.
Dam takin le