Aizawl: Serchhip District Conference hmanpuitu, MPCC president hlui, tuna Congress Working Committee (CWC) member ni mek, Lal Thanhawla chuan Mizoramah sorkar tha siama sakhaw zalenna tungding leh turin Congress party kaihthawhin a awm tih a sawi.
Ningania Serchhip Bazar-a intawhkhawmah Lal Thanhawla chuan India ramin sakhaw zalenna a neih theih chhan chu Congress a nih thu a sawi a, “Tunah BJP sorkarna hnuaiah India ram hmun hrang hrangah Kristiante an chep hle. Manipur bikah pawh Kristiante chungah harsatna nasa takin a thlenga a. Kristiante tum bik an ni,” a ti a. BJP sorkar hnuaiah Kristiante leh sakhaw dang an him loh thu leh hnam tenau zawk chimral tumna a lian hle niin a sawi.
Congress chuan sakhaw tih bik neih a dodal nia sawiin Lal Thanhawla chuan, “Mizoram mipui pawhin kan sakhua leh kan hnam a him theihna turin eng party nge chawi len ngai tih ngaihtuah a hun. Vote thlakna tur uluk loh nasa taka tuartu chu Manipur state atang pawhin a chiang a ni,” a ti.
ZPM chungchang sawiin Lal Thanhawla chuan, “Kalphung thar an sawi a, an kalphung hlui hi eng nge ni ang? Val Upa Council leh tih loh atana an sawi ang apiang an ti leh vek bawk si a, khawi laiah hian nge kalphung thar ka la hmu lo,” tiin, ZPM kalphung thar chu tih loh tura sawi tih leh si a nih thu a sawi.
Lal Thanhawla chuan Pathianin Congress party a chawlh hahdamtir a, MNF unaute an lo sorkar tih sawiin, “Ram leh hnam tana an hnathawh hmasak ber chu hming thlak a ni,” tiin, “MNF-in ar vulhna atan maia an chhuah, Pathian leh mipuite zarah Congress-in sorkarna a chan hnuah Mizoram Institute of Medical Education & Research (MIMER) tha tak mai a din chu, engmah hnathawh awm si lovin Zoram Medical College tiin an thlak a. Kan Pathian hmingte hi an thlak duh mai ang tih hlauhawm khawpin hming thlak lamah an tui a hal hi a zia lo hle,” a ti.
India ram leh Mizoram dinhmun tur ngaihtuah thleng phak politics ngaihven a tul nia sawiin MPCC president hlui chuan, “Kan sakhua a him loh chuan kan hnam a him lo va, kan ram a him ngai lo vang. Congress sorkarna hmunah Kristiante tunah zalen takin chanchintha an hril thei. Karnataka State-ah hneh takin Congress a sorkar a. Anti-Conversation Law an thiat a. Hmanni lawka Karnataka hneh taka sorkarna chelhtu Congress chuan Kristian Development Corporation din tumin ruahmanna an siam a, hemi atan hian Rs. vaibelche 100 a dah hrang tawh hial,” tiin, hei hian Congress party chu sakhaw zalenna kengtu a ni tih a nemnghet chian thu a sawi.
Mizoramah Congress party chu hruaitu a nei tha ber a nih thu sawiin Lal Thanhawla chuan, “President mi thiam leh rintlak Pu Lalsawta kan nei a. Thachhangdawltu tha tak kan neih bawk avangin tun inthlanah pawh kan chak ngei kan beisei. Sorkar tha siam tura kan intih chak tawn avangin vawiinah pawh mi thar za telin Congress an zawm a ni. Mizoramah sorkar tha siama sakhaw zalenna tungding leh turin Mizoramah Congress party kaihthawhin a awm leh mek. Mizoram mipuiten eng party nge hmanrua a hman tur leh chawi len tur hriat a ngai,” a ti bawk.