Congress party President Lalsawta’n kumin MLA inthlanpuia an party aiawha Aizawl West III constituency-a ding turin nimin khan hming a pe lut.
Nomination a file hmaa thu thar thehdarhtute’n an kawmnaah Lalsawta chuan Mizoram State Assembly inthlanpui neih turah an sorkar theih a beisei thu a sawi a. Amah ngei pawh a tlin theih a rin thu a sawi.
Congress an tlin theihna chhan tur zawhna chhangin Lalsawta chuan, Mizoram mipuite chu an mangang tawh a, Mizoram hma hun a thim tih pawh mipuiin an hria a, he dinhmun chhe tak lak atanga chhan chhuak tu tur awm chhun chu Congress party a ni tih an hria a. Central BJP hi a lal chhoh mipuite’n an hlau tawh a. MNF leh ZPM te hi chu BJP hian Mizorama luhna kawngka atan an hmang a. Congress chuan engti kawng mahin BJP hi an thawhpui thei dawn loh thu a sawi.