November 7, 2023-a Mizoram State Assembly inthlanpui neih turah chuh tum mi 174-in hming an pe lut.
Mizoram State Assembly inthlan lo awm tura chuh tumte tana hming pek luh theih hun chu nimin tlai dar 3 khan a tawp a. Hriat theih chinah MLA inthlanpui chuh tum mi 174 an awm a. Aizawl district chhunga hming pe lut tam berin mi 55 an awmin, Lunglei district-ah chuh tum tam ber dawt niin mi 27-in chuh an tum bawk.
Siaha district-ah mi pakuain chuh an tum a, Champhai-ah mi 10, Kolasib-ah 12, Serchhip-ah 15, Lawngtlai-ah 13, Mamit-ah 14, Saitual-ah 11, Khawzawl-ah pali leh hming pek luh tlem berna, Hnahthial district-ah chuh tum mi pathumin hming an pe lut bawk.
Kumin MLA inthlanpui lo awm turah chuh tuma hming pe lut zingah party lian pali MNF, ZPM leh Indian National Congress (INC) chuan bial 40-ah chuh tumin hming an pe lut theuh a, BJP-in 22, AAP-in pali bakah independent-a chuh tuma hming pe lut mi 28 an awm a ni.
MLA General Election 2023 lo awm tura chuh tuma hming pe lut te hi October 21, 2023 hian endik an ni dawn a, hming pe lut zingah inhnukdawk duh tan October 23, 2023 thleng hun hawn a ni.