Indian police officer pakhat, online game chi khat a khelh atanga Rs. maktduai 15 zet mantu chu a hna atanga chawlh lailawktir (suspend) a ni.
Maharashtra-a Pune district-a police sub-inspector Somnath Zende-a hian online fantasy league pakhat, Dream 11 a khelhna atanga a pawisa hlawh hi online-ah a dah chhuak a ni.
Thuneitute chuan police inkaihhruaina (code of conduct) a bawhchhiat avangin an hrem tih an sawi.
Zende-a erawh chuan hrem a ni lo niin a insawi thung a, department-in an chhui dawn chauh zawk niin a sawi.
A thawhna, Pune-a Pimpri Chinchwad huam chhunga police department chuan BBC Marathi hnenah phalna la hmasa lova game a khelh avang leh uniform ha chunga chanchinbu mite a kawm avangin hrem a ni tih an sawi.
Zende-a erawh chuan ‘fair lo takin’ a chungah an ti niin a sawi ve thung.
Dream 11 hi thla hmasa atang khan a khel ve tan a. October 10 khan a chak avangin Rs. maktduai 15 zet a dawng niin a insawi.
Dream 11 hian ‘game of skill’ tia insawiin kum 2021-a Supreme Court-in thutlukna a siam hmanga teh pawhin an game chu ram chhunga gambling law-in a phuar ve loh chin an nih thu an website-ah an tar lang.
Pawisa khelh (gambling) hi India-ah hian phal a ni lo va; mahse, gaming industry chuan ‘online skill-based gaming’ nen a hrang niin an sawi thin ve thung.
Dream 11 hi cricketer lar, MS Dhoni pawh ambassador a nihna niin a thehlartu dangah Bollywood lemchan thiam tak tak, Aamir Khan thlengin an hmang bawk.
Kum 18 chung lamin infiamna an ngainat zawng – cricket, hockey, football leh basketball chu online-in an khel thei a. A khelte hian virtual team siamin a taka hmingpute hming vekin player pawh an nei thei a. An player-ten a taka an chet dan azirin game-ah hian point an hlawh chhuak thei.
Zende-a hian India-a Cricket World Cup khelh meka Bangladesh leh England inkhelh tum atang khan pawisa hi a man a ni.
A man hnuah hian Zende-a hian police uniform ha chungin chanchinbu mite hmaah a inlan ta mai nia sawi a ni.
Maharashtra leh India-a rorel lai, BJP worker pakhat, Amold Thorat chuan chief minister leh a deputy hnenah lehkha thawnin ‘inthapnaa’ Zende-a a inhnamhnawih avangin hrem turin a ngen.
Thorat-a hian hna a thawh laiin Zende-a hian game a khel a, hei hi ‘hna ngaihthah’ niin a sawi.
Zende-a’n police uniform a ha lai thlalak hi hi online-ah a darh nasa hle a, hei hian ‘state police force-te hmel a mawi lo takin a lantir’ niin a sawi bawk.
Zende-a erawh chuan a duty laiin a khel lo niin BBC Marathi hnenah a sawi a. Amah chauh lo pawh police zingah game khel an tam niin a sawi bawk.
“Mi tam takin he game hi an khel a. Sport a ni a, darkar tam tak an khel thin,” a ti a. “Pawisa khelhna pawh a ni lo chungin hrem ka ni ta tho a ni,” a ti.
Zende-a hian a pawisa man chu in sakna tur pawisa a puk rulh nan leh a fate hminga fixed deposit account hawngin a dah dawn tih a sawi.
Departmental inquiry neih a nih lai hian Zende-a hi insawi fiah tura a inlan phal a ni ang a. Police hotu chuan inquiry committee-in report an pek hunah department-in a chunga an tih zel dan tur chu a chiang dawn niin a sawi.