Japan winger Kaoru Mitoma chuan kum 2027 June thleng Brighton & Hove Albion a khel turin contract thar a ziak.
Kum 26 mi Mitoma hi Seagulls squad a player pawimawh ber zing ami a ni a, season liamta khan tun season a Europe huap inelna a tel tura an tlin theihna kawngah a thawhhlawk hle a. Inelna hrang hrangah match 41 khelin goal 10 a khung a, midang goal khung tur vawi riat a siamsak tel.
Kum 2021 khan Japan international hian an ram club Kawasaki Frontale atangin Brighton hi a zawm a. Belgian club Union SG-ah inchher hriam turin loan in a kal nghal.
Belgium-ah hian che tha in match 29 atangin goal riat a khung a. Season liamta khan koh kir niin Brighton tan manager Roberto De Zerbi hnuaiah nasa takin hma a sawn.
Tun season-ah Mitoma hi Brighton tan a che tha leh hle a. Match 11 khelin goal thum a khung bakah assist vawi li a nei tawh a. Wolverhampton Wanderers laka August thla a goal a khung chu Premier League Goal of the Month a thlan a ni.
A chetthat avangin club lian hovin an ngaihven nasa hle nia sawi a ni a. Hei vang hian Amex Stadium-ah Brighton in contract thar an ziahpui a ni.
Brighton technical director David Weir chuan, “Kaoru theihna ang nei player hun rei zawk atan chelh theih hi kan tan chuan chanchin lawmawm tak a ni. Season hmasa khan Premier League-ah mikhual miah lovin a khel a, kan player pawimawh berte zinga tel turin a invawrh thei a ni.” a ti.