- Laiu Fachhai
- THUHMA
Mihringte hi, Kristiante telin, kan lo double standard hlawm hle. “Double Standard” tih hi mahni ina zawm tum chuan loh dan leh dun leh policy te midangte zawm tura beisei tlatna nun a kawk a, mahni ina hman tum loh tehkhâwng midangte hmang tura beiseina leh, mahni tana kaldan tha leh hamthatna siamte midangte neih ve phal loh sawina a ni. Double standard hmang thin ho chuan mahni dik lohna an hmuh thei thin lo; midangte dik lohna erawh chu rang takin an hmu theih thung. A Sap tawngah chuan, a hmanna a zirin plural form, “double standards”, hmanna turte a awm a, Mizo tawnga ziah article-ah erawh hi chuan, “double standard” tih hi plural form atan pawh hmang mai ila a tha mai awm e.
- KHAWTHLANG LAM DEMOCRACY, HUMAN RIGHTS LEH KRISTIANNA DOUBLE STANDARD
Khawthlang lama democracy leh Kristian inti ramte khu an double standard hlawm hle. Democracy leh Kristian ramte an nih hmaa ram dang leh hnam dangte an run a, hnam thenkhat phei chu an tichimit ang a ni a, an ramte laksakin an awp zui te kha chu “mawl” hun lai a nih avangin hriatthiamna chen awm mahse, Kristian ram an nih hnu leh an ramah democracy leh human right an championpui hnuah pawh ram dang leh hnam dangte an run a, an awp a, an mihringpuite sala manin an hralh a, an lei thin te erawh kha chu a mak hle a, hriatthiam har tak a ni. An ramah leh anmahni hnam tan chuan democracy leh human right ngai pawimawhin an hmang a, an colonial ram leh hnamte erawh chu democracy leh human right neih ve an phal lo. Chuvangin ziaktu mithiam thenkhat phei chuan Europe hi Kristian ram a ni ngai lo an ti hial a ni.
Kum zabi 15-naa Portugal ho sak Ghana rama sal sumdâwnna, Elmina Kulh chhung laili berah biak in a ding a. Kulh biak inah chuan zingah an tawngtai a, kulh atang bawk chuan tlai lamah Europe-a hralh tur salte phurtu lawng a chhuak thin. Sal sumdâwna Elmina Kulh chu kum 1637 atangin Dutch kutah a awm a, Dutch Kristiante chuan kum 1814 thleng sal sumdâwna an chhunzawm a ni. Kristian ram United Kingdom (UK) pawh kum 1807-ah chauh khan sal sumdâwna a titawp a, sal neih (slavery system) hrim hrim erawh chu kum 1833-ah chauh a titawp a ni. Chutichung pawh chuan an colonial rama salte chu kum 1838-ah chauh an chhuah zalen thei a ni.
USA-ah pawh Mingo Kristiante tan chuan democracy leh human right hun rei tak chhung hman a ni tawh a, Mihangte erawh chu, Mihang Kristiante telin, democracy leh human right an neih ve phal a ni lo. A bik takin, Bible Belt (Bible ram zau khat) an tih, USA Chhim lamah chuan Mingo leh Mihang inpawlh lohna leh Mihangte tan neih theih leh theih loh, tih phal leh phal lohte siamna Segregation Dan kha kum 1960s thleng an hmang a ni. Bible Belt hming an pu zo lo hle.
South Africa-ah pawh khan kum 1990s thleng Apartheid System (Mingo leh Mihang inpawlh lohna leh Mihangte tan neih theih leh theih loh, tih phal leh phal lohte siamna dan) kha an hmang a. A ram awptu minority Mingo Kristiante chuan democracy leh human right an enjoy a, a ram neitu majority Mihangte erawh chu democracy leh human right enjoy ve phalsak an ni lo. Voting right takngial pawh an nei lo. Mingoten Mihangte ram zawng zawng deuhthaw an laksak vek a, South Africaa mihring awm zat 60+ million-a zaa pariat (population million 5 aia tlem) Kristian Mingo minorityte chuan South Africa ram zaa sawmriat (80%) vel an nei ta a, a ram leilung fa, zaa sawmriat (population million 50 vel) Mihang majorityte chuan zaa sawmpanga (15%) vel chauh ram an nei tawh a ni. South Africaah khuan Coloured (mixed) 9% leh Asian/Indian 3% an awm ve. Chuvangin Arch Bishop Desmond Tutu chuan, “Missionary-te (Mingo Kristiante) Africa rama an rawn kal tirh chuan, anni in Bible an nei a, keini in ram kan nei thung. ‘I tawngtai ang u’ an ti a. Kan maimit chhing a. Kan han meng leh chu, keini in Bible kan nei a, anni in ram an nei ta,” a ti hial a ni. He thu hian Kristian inti si, mahse double standard hmang tlat Mingote aiin Mihangten Kristianaah an tak zawk tawhzia a kawk a ni.
Britain-in India a awp lai pawh khan, Britain chu democracy ram ni tawhin human right te an sawi uar tawh a. India-ah erawh chuan democracy leh human right system hmang lovin bureaucracy system hmangin ro an rel a ni. Kum 1920 vel atang khan India-ah election an kalpui ve a, Mingote tan nominated seat an siam leh zel a nih kha. Khatih laia elected memberte kha tunlaia MLA leh MPte ang hian thuneihna lian leh sang an neiin a lang lo. Mizoramah chuan Mingo (Sap) kan hmuh tam zawk leh kan kawm tam zawkte kha min hmangaihtu missionaryte an nih avangin, Sap ngaihsanna kan neih pawh hi hriatthiamna chin a awm. Phai lama kan Indian puite erawh chu British sawrkar (Mingote) khan hmuhsitna, rahbehna leh tihduhdahnain an chungah ro an rel a, an zalenna leh an human right an palzut nasat avangin anti-colonial thinlung an neih pawhin hriatthiamna chen neih a ngai a ni.
Tunlai Israel leh Hamas indohnaah hian Khawthlang lam democracy sawrkarte double standard a lang leh hle. Civil mi tamtak thattu Hamas thiltih dan chu dem loh theih a ni lo. Chutih rualin Israel sawrkar chuan nuai sawmhnih aia tam Gaza mipuite tan chaw, tui, damdawi, khawlphetha leh fuel (petrol, diesel, etc) a cut sak vek a, ram dang kalna kawng a dan chah sak vek a, Palestine civil mipuite chu, Kristiante telin, harsatna sawi hleitheih loh leh sawi sen rual loh an tuar mek a ni. A sei lam km 41 vel leh a zau lam km 6-12 vela lian Gaza ram pumpui chu tân in lianpui ang a ni ta mai a ni. Hei hi Khawthlang sawrkar thenkhatte chuan sawisel duh loin ngawih an chuh tlat a ni. Israel civil mite human right chu Palestine civil mite human right aiin an ngai pawimawh zawk a ang hle. Israel sawrkar chuan kum 1948 atang khan tun thlengin Palestine ram a awp zel a, Palestine mite tan chuan, Kristiante telin, nun a chepzia leh zalenna a awm loh thu pawh Khawthlang lam sawrkarte chuan an sawi duh lo. Israel an tan tlat a, Israel sawrkar sawisel chu anti-semitism (Juda ho huatna leh dodalnaa) ngaih zel a nih avangin thudik sawi ngam pawh a ni lo, Juda ho tantute chu an silai a lian si a. “Chakna chu dikna a ni” (Might is Right) an tih thin kha a la dik reng hi maw!
America leh NATO chuan sovereign ramte (Iraq, Afghanistan, etc) an run thei a, ram dangte erawh chuan an tih ve tur a ni lo. He Khawthlang lam sawrkarte double standard hi Ukraine leh Russia indohnaah hian a lo lang leh a ni. Russia-ina Ukraine a run chu dem loh theih a ni lo. Russia dem rualin America leh NATO ina sovereign ramte an run pawh kha dem ve tur a ni. Mahse an dem duh lo. Russia war crime sawi tur an nei tam hle a, Ukraine erawh chu war crime a nei lo ang tluk a ni. An sawi duh miah lo. Khawthlang sawrkar leh mainstream media-te chuan Ukraine sawrkarin East Ukraine-a cheng Russia hnamte chunga kut a thlak dan te an hre duh lo. NATO-in Russia ramri lama a ram (NATO member ram) a tihzau zel avanga Russia chuan him tawk lo anga a inngaihna leh Ukraine chu NATO zawm tir lo tura a ngenna te ngaihsak a hlawh lohzia te pawh an sawi duh miah lo.
Chutiang chu a ni, democracy leh human rights championpuitu Khawthlang lam sawrkarte leh an mainstream media te double standard chu ni. Dictator, sipai, communist leh socialist rorelna ramah te chuan thudik, mihring zalenna leh dikna te palzutin double standard an neih pawhin a nihna tur anga ngaih theihna chin a awm a, democracy leh Kristian ram inti leh zelah hetiang thil a awm hi, hriatthiam har tak chu a ni.
- INDIA POLITICAL PARTY-TE DOUBLE STANDARD
Kristian hmeichhia, Pi Sonia Gandhi, chanchin hian ngaihtuahna a tithui duh hle. Pu P.A. Sangma chuan Congress sawrkar a Lok Sabha Speaker a nih lai khan, “Sonia Gandhi hian Kristian sakhua a zui lo, Biak inah a inkhawm lo,” (Sonia Gandhi is not a practicing Christian and does not go to church) a ti a (India Today Feb 1, 1999; updated Feb 28, 2013). P.A. Sangma thusawi hi a dik ang. Pi Sonia Gandhi hi Biak inah a inkhawm lai hmuh tur a vang hle a, Hindu temple-ah erawh chuan a kal thin thung. Secularism leh sakhua zalenna tlangaupuitu, India hruaitu, Pi Indira Gandhi khan eng vangin nge a monu chu Kristian sakhua a zui zel dusakin a fuih mai loh le? Secularism leh sakhua zalenna tlangaupuitu a pasal Pu Rajiv Gandhi pawhin eng vangin nge a nupui chu Kristian sakhua zui zel turin a duhsak mai loh? A nu leh a pasalin an beisei tlat a, nawrna (pressure) a awm avanga Pi Sonia hi Hinduah inlet a ni ang em? Nge amah zawkin Hindu sakhua chu Kristian sakhua aia dik zawk leh tha zawka a hriat leh a pawm avanga Kristian sakhua kalsanin Hindu sakhua zawm a ni zawk? Nge a rukte chuan a la Kristian rih nge…? Kei a ziaktu hian a chhanna ka hre lo.
India Today Feb 1, 1999; updated Feb 28, 2013 article, “By stressing Hindu values Sonia Gandhi enhances personal acceptability and Congress appeal” tih thupui hmanga Harish Gupta thuziak eng atanga thlir chuan, Pi Sonia Gandhi-in Hindu sakhua lam a awn zawkna hi, Hindu sakhua chu Kristian sakhua aia dik zawk leh tha zawka a hriat leh a pawm vang a nih loh chuan, Hindu majority ramah Kristian ina national party lian hruaitu leh Prime Minister ni tur chu Hinduten an pawm thei lo ang tih ngaihtuahna avangin pawlitika hamthatna (political advantage) lakna ni berin a lang. BJP chauhin Hindu vote bank politics a khel lo a, Congress pawhin Hindu vote bank politics a khel ve tho tihna a nih chu.
Indian origin leh Hindu sakhua zuitu, Pu Rishi Sunak, in Kristian ram anga chhiar thin UK-ah Prime Minister a han ni thei chu India Hindute chuan an lawmpui hle a, mahse Italian origin Kristian, Sonia Gandhi, India Prime Minister ni tur erawh chu Hinduten (eng party pawh nih se) an pawm thei leh si lo, hei pawh hi party politics double standard dik tak a ni. National party ten, eng party pawh ni se, Hindu sakhua lam an awn zawkna chu Hindu majority te vote hmuh nan political advantage an la mai a ni. Central-a rorel lai BJP sawrkar chu Hindu sakhua chawisan tum anga puhtute leh sawiseltu party leh sakhaw dang mite pawh sakhuana feeling leh emotion hmanga political advantage lak an tum ve tho a ni.
Muslim ho pawh hi an lo double standard hle. Minority an nihna ramah chuan democracy, secularism, religious freedom, human right, etc. te an tlangaupui a, majority an nihna ram tamtakahte erawh chuan chungte chu championpui an tum lo. Theocratic Islamic State (Country) din an duh zel. India pawh hi Muslim majority ram ni ta sela, sakhaw dangte hi tuna kan zalen ang hian kan zalen lo maithei a ni. Khawvel pum huapa thlir phei chuan sakhaw dangte dawhtheina (religious tolerance) thuah chuan, Buddhism hi dawhthei ber sakhua anga sawi ani a, Hinduism leh Christianity sakhuate pawh hi an intluktlang vel a, dawhthei tak an ni ve ve. Islam erawh chu dawhthei loh ber sakhua a ni. Chuvangin lehlamah chuan, India hian Hindu majority ram a ni hi sakhaw dangte tan zalenna a awm zawk a ni.
- MIZORAM KOHHRANTE DOUBLE STANDARD
Mizoram Kristiante pawh hi sakhaw dangte thlirna tlang atang chuan kan lo double standard hlawm hle. Anmahni duhthlana mah ni se, Kristian sakhua atanga sakhaw danga (Hinduism, Islam, Buddhism, etc.) inlet an awm chuan kan lawm lo hle thin a, anmahni duhthlanna bawka sakhaw dang atanga Kristiana lo lut an awm erawh chuan kan lawm hle thin. Hetiang tho hi sakhaw dangte rilru put dan tur a ni ve tih erawh kan ngaituah sak duh miah lo. Kan rin Pathian hi Pathian dik leh nung a nihzia kan hriat avangin Chanchintha chu kan hril zel tur a ni. Chutih laiin sakhuana thuah chuan sakhaw dang zuitute pawhin an sakhua chu dik bera an hriat ve tho avangin an mi leh sate an veng ve ang a, Kristiante pawh min hneh an tum ve ang tih erawh hriat tel a tha.
Mizorama kohhrante zingah pawh kohhran danga memberte chu chhandam ni lo tur anga ngai tlat kohhran pawlte an awm a ni awm e. Chung kohhran pawlte tan chuan Mizorama kohhran pawl dangte chu an mission field a ni a, chuvangin tirhkohte tirin anmahni kohhran pawl din thuah zel an tum a ni. Kohhran ziding intite pawhin, mahni pawl tihzau tumin hma an la hlawm a, kohhran pawl dangte awm tawhna khua leh vengah te anmahni kohhran pawl an din thuah a, thingtlang khua te reuhte ah pawh kohhran pawl pathum pali lai an awm hlawm hi maw. Kohhran leh kohhran mah inrunin member kan inlaksak zel a nih chuan, sakhua dangte phei chuan min hneh an tum ve ang chu. An hlawhtlin leh tlin loh erawh chu Kristiante rinnaah a innghat a ni.
- MIZORAM POLITICIANTE LEH POLITICAL PARTYTE DOUBLE STANDARD
Mizorama politician thenkhat leh political party te pawh an double standard hlawm hle. “Pathian leh kan ram tan” tih thupui political party motto atan neih te hi Mizoram Kristiante mit atanga thlir chuan tha hle anga lang mah se, India secularism mit atanga thlir erawh chuan a secular lem lo a, missionary nuai khat tirhchhuah tum pawh a secular lem lo. Rorel lai party te inzawmkhawmna (Alliance) ah an tel ve avangin Centralah chuan treasury bench-ah thu si, Mizoramah erawh chuan Alliance party member atanga thlantlin MLA chu treasury bench-ah thut tir duh leh si loh te hi double standard langsar tak a ni. Secularism tlangaupuitu party thenkhatte lah chuan Centrala rorel lai BJP sawrkar chu Hindu sawrkar anga puhin haw em em si, mahse BJP memberte chhiah pek sum erawh hnawl leh duh si lo; hei pawh hi double standard a ni. Zu khap burna state ni si hian, Central atanga sum rawn kal zingah zu chhiah a tel ve a ni tih hre lo der te pawh hi a double standard hle bawk.
Inthlan pui a hnai leh tawh a, party hruaitu nihna leh member nihna atanga banna lehkha thehluh, party dang zawm leh lawmluh tihte a tam hle. A boruak siamna atan chuan a tha phian awm e. Chutih laiin party danga kalte chu an kalsan party tan chuan zuanglawr leh mi rinawmlo nih an hlawh a, party dang atanga anmahni partya lo lutte erawh chu mifel leh ram hmangaihtu an ni thin. A double standard hle. Opposition an nih laia nasa taka an sawisel thin rorel lai party chu inthlan dawnin an zawm leh ta si a, eiru, thleibik nei, hna thiam loh leh rorel tlak lo a an sawi thin politiciante leh ruling party chu politician tha leh party tha ber leh rin tlak ber a ni leh ta thin a ni. Ruling party-a awm thin memberte pawhin ruling an nih laia a chhe thei ang ber leh rin tlak lo anga an sawisel thin party chu an zawm duh leh tho si a, party tha tak a nihzia an hre thar leh thin a ni awm e. Chutianga a chhe thei ang bera an sawisel thin party te an zawm leh si hian, an hmai an inkhap thei mai te hi thilmak a tling a ni. Zahtheihlohna thlarau hnathawh an chang hlawm tawh a nih dawn hi maw.
Opposition an nih laia ruling thiltih dik lo leh tha lo hmu thei hle si a, ruling an nih ve hunah erawh chuan anmahni thiltih dik lo leh tha lo an hmu leh thei miah si lo te hi double standard dik tak a ni. Party politics chu rei vak lo (temporary) tan a ni a, chuvangin inhmelma hlen tur emaw, in thian hlen tur emaw an awm chuang lo an ti hi a lo dik fu. Politics chu thuneihna (power) a ni a, thuneihna an neih theihna tur a nih dawn phawt chuan kal dan dik leh thil thaa an ngaih thin, an principle, kalsan (compromise) a, politician kawr an hak chhung chu double standard neih pawh an pawi ti lo a nih hi maw.
- TLIPNA
Central a roreltu, national party ah chuan, eng party pawh ni se, MP tam zawk chu Hindu an nih zel dawn avangin Hindu sakhuana lam an awn zawk ang tih chu hriat sa a ni. Chutih lain Centrala roreltu, eng party mahin, India hi Hindu Lal Ram, Theocratic Hindu State (Country) nih tir an tum a rinawm lo. Nih tir tum ta se, India leh Pakistan inthen (partition) laia ram buai ai khan a buai nasa zawk fe ang tih an hre vek a, chuvangin an fimkhur hle ang a, chutianga constitution amendment lian agenda chu Parliamentah an luhpui a rinawm loh.
Centrala roreltu party chuan Hindu sakhua lam a awn zawk a nih pawhin, Pathian nung betu Kristiante tan chuan hlauh tur a awm lo. Kristiante tan chuan sakhaw dangte aiin materialism (thlarau nun aia tisa nun ngaihtuah zawkna) a hlauhawm zawk. Secularism leh sakhua zalenna te hi ringtu member tipungtu leh thlarau nun tihchaktu an ni hran lo. A lehlamah chuan tichautu a nihna pawh a awm zawk mah. Tihduhdahna chu cho chhuak tur a ni lo. Sakhua zalenna pawh Mizoram leh Indiaah a awm zel a rinawm. Chutih rualin Kristiante tan nun a lo chep a nih pawhin, khawvel Kohhrian history kan chhiar chuan, Kristiante chuan an Kristian nun a chep a, tiduhdahna a tam poh leh an thlarau nun a chak a, ringtute pungin kohhran a thang chak thin a ni. Tunlai khawvelah pawh Kristiante an zalen lohna China ram chu ringtu pun chak berna ram a ni daih a ni.
Double Standard neih hi a democracy lo chauh ni lovin, a Pathian thu lo hle. Chuvangin Lal Isuan, “In thu sawi chu ‘ni,’ emaw, ‘ni lo,’ emaw ni ngawt rawh se, chûng aliam chu sual laka chhuak a ni,” (Mathaia 5.37) a ti a, “In chungah miin ti se in tih ang ngeiin mi chungah pawh ti ve rawh u,” (Luka 6.31) a tih angin, Kristiante chuan kan Kristianna leh politics kan kalpui danah te hian double standard nei lo leh hman loh hram i tum ang u, chu chu kan rin Pathian duhzawng a ni si a.