Khamzat Chimaev-a’n UFC contract thar ziak

Zanin a cage chhung lut tur Ultimate Fighting Championship a fighter lar chak tak Khamzat Chimaev chuan contract thar, hun rei zawk daih tur a ziak.

Chimaev-a manager in inremna thar an ziah thu hi tunkar khan a sawi a. Zaninah UFC 294-ah welterweight champion hlui Kamaru Usman nen an inhmachhawn dawn.

An inremna ziah hi ril zawka puanzar ni lo mahse Chimaev hian UFC-ah vawi engemaw zat a la inlan belh dawn tihna a ni a. A contract neihlaiah vawi hnih inlan theihna a nei mek.

UFC president Dana White chuan zanina Usman nena an intum tur hi champion thar Sean Strickland hmachhawn tur zawnna a nih thu a lo sawi tawh bawk.

Chechnya a piang Swedish fighter hian kum 2020 khan UFC-ah inlan tanin welterweight leh middleweight-ah a inlan ve ve thin a. MMA-ah vawi 12 a inlan tawh atangin hnehna a chang vek.

A khingpui tur kum 36 mi Usman hi 20-3 record nei niin middleweight-ah a inlan hmasak ber a ni ang.

Leave a Reply

error: Content is protected !!