Aizawl : MZU Alu- mni-in nimin khan MZU Auditorium-ah Annual Meet an hmang a. Mizoram Larsap Dr Hari Babu Kambhampati-a’n a hmanpui.
Larsap chuan MZU atanga zirchhuak tawh mithiam rual leh mihlawhtling tak tak intelkhawm ten Mizoram University hmasawn zelna atana theihtawp an chhuah chhunzawm chu lawmawm a tih thu a sawi a. University tha tehfung atana thil pawimawh tak pakhat chu, University atanga zirchhuakte hlawhtlinna, an hnathawh leh an thil tih te a nih thu a sawi.
MZU-in tunhnaiah hmuh theihin hma a sawn nasa nia sawiin, a kum zawnin NIRF ranking a India ram University thazual 100 zingah a tha pawl nihna a hauh mai ni lovin hma a sawn zel tih a sawi a. He hlawhtlinna kawngah pawh hian Alumni te chu hmanraw pawimawh tak pakhat an nih thu a sawi.
Larsap chuan MZU Alumni ten MZU hmasawnna atan, kawng hrang hrangah tih theih tam tak an neih bakah tuna zirlaite tan, kawng sial saktu leh kawng kawhhmuhtu an ni tel tih a sawi a. India sorkar hnuaia social security scheme leh hamthatna scheme tam tak mipuiin an hmelhriat loh avangin an dawng lo nia sawiin, hemi kawngah hian beneficiary te hriatthiam tura heng scheme hrang hrang te hi zirtirna petu ni turin mithiam kalkhawm te chu a sawm bawk.