Inthlanna a pawisa sen tam hi corruption bul tantu pakhat ani tih ani thin a. Mla a tlin tumin sum tam tak an seng a. Candidate thenkhat phei chuan mi pawisa an puk a. thenkhat chuan mahni in leh lo dahkhamin loan an la te an ti hial a. An pawisa sen hmuh let leh nan chuan khawi atang mahin pawisa a awm ngawt lova. Sawrkarna an chan chuan chumi rulh lehna tur chu siam dan dang a awm chuang lova. Mipui pawisa awm sa kha eiruk ani mai a. Thil chiang sa reng a ni. An pawisa sen hi a thlawn ngawt chuan an chawi ngai lova. A thlawna hetianga swng tur hian a tam ber hausakna hian a tlin lo. Tin, a hman tur nei / kawl sa pawh hian a thlawna seng turin mizo hausakna hian a la tlin hlawm lo bawk. Chuvangin corruption hi inthlan dawn atanga intan daih ani tawh a ni.
Aizawl khawpuiah bik hi chuan chuti taka sum sen a tam lova. A tam lo han tih hian thingtlang lam ang em chu ani lo tih theih chauh ani tho mai. Tin, pawisa sen tum rilru hi a awm hrim hrim bawk. Thingtlang lam bialah pawh hian a kal velna leh thingpui han inkhawmna bak sen em em ngai lem lo bial an awm a. Inthlan sawi rik atanga hautak em em bial ni nghal ringawt hi an awm bawk. A bial mihringte an dik lo ani pawh a tih ngawt theih lohva. A bul tanna chu tu politician in emaw a hma atangin an lo ti vir laklawh tawh ani thin. Chutiang bialah chuan pawisa nei tam lo tan chuan han inrawlh ve ngam pawh ani meuh lo. Inthlan laia hlawkna an lo hmuh thin tawh avangin hmuh leh kha an duh a, kalphungah an lo neih tawh a ni.
Inthlanna thianghlim leh fel fai kan tih hian buaina awm lo ngawt ani lova. Mipuiin engmah sum leh pai, hlawkna hrim hrim pawh beisei lova, thinlung thianghlim, tha nia an hriat takte an thlanna kha a ni ber a. Vaubehna leh inbumna boruak a awm tur ani lo. Tlin tuma sum senga inthlemna te pawh hi a awm tur ani lo bawk. Inthlanna thianghlim leh fel dik tak nei thei bial nihte hi a ropui a. Sum sen tam a ngaihna bial nihte pawh hi a zahthlak a. Sum sen tam ngaihna bial kan nih chuan miin a bial pum min hmuh dan hi a dik lo ani tih hre reng ila. Tumahin mi hmuh nikhua loh nih kan duh hauh loh kha. Sum sen tamna bial ni lo tur hian a bial chhunga kohhran leh yma te pawh hian tan lakna chang hria se a tha ngawt mai. Lei theih hmuha miin min hmu anih chuan mihring hlutna a bo a. Zahawmna kan beisei thei tawh thin lo. Dik taka thlan tlin Mla neih tum ila. Dik lo sawi ngam lo bial ni lovin bialtu Mla pawh a dik lohnaah chuan khak ngam turin sum i eisak lo ang u. Chu chu politician tha lo hnawl bona kawng dik a ni.