Taliban chuan Afghanistan sorkar an paih thlak tak leh an thawhpui, khawthlang ramte beia thihchilhtute fakin an chhungte chu pawisa leh ram pek an tiam tih interior ministry chuan a sawi.
Taliban sorkara interior minister nihna chelh mektu, United States-in a lumana $ maktaduai 10 lai an chhiar, Sirajuddin Haqqani chuan Kabul-a Intercontinental Hotel-ah kum 2018-a thihchilha bomb tipuaktu chhungkuate a ko khawm.
Thawhlehnia an inhmuh khawmnaah hian Haqqani hian a hmel a tilang lo thung.
“A thu sawiah minister chuan Jihad leh martarte fakin Islam leh an ram tan pasaltha an neih thu a sawi,” tiin Taliban sorkara ministry chuan Twitter-ah an tar lang.
Thilhchilhtu chhungkuate hnenah hian Afghani 10,000 ($111) an pe dawn a, ram pek an tiam bawk niin ministry thupuangtu, Qari Sayeed Khosti chuan a sawi.
Haqqani-a hian a pa, Jalaluddin Haqqani-a din firfiak pawl, Haqqani network hotu nihna chelh chhunzawmin an pawl hi Taliban nena inzawmna nghet tak nei an ni a. Khawthlang rama intelligence service-te chuan Afghanistan-a an awm laia thihchilh bomb lian tak tak tipuaktua an ngaih an ni.
Kabul-a kum 2008-a khualbuk beihnaa mi paruk an thihna avangin Federal Bureau of Investigation (FBI) mi man duh a ni.
Afghanistan-a hian August thlaa Taliban-in khawthlang ramte puih mipui sorkar an hneh hnuah ISIS firfiakte chuan thihchilh bomb an tipuak fo va, a bikin mosque an bei nasa a, civil mi za chuang an thi tawh.