Virat Kohli-a’n one-day international a century vawi 48-na a siam zanah India hnehna a chanpui a. Bangladesh lakah wicket sarih in Men in Blue an chak.
Pune a Maharashtra Cricket Association Stadium a inkhelah hian India in chak turin run 257 siam an mamawh a. Over 8.3 hmang bangin Kohli hovin hnehna an chang. Indian legend Sachin Tendulkar-a’n ODI century vawi 49 a siam chu vawi khat chiahin a pha lo mek.
India in an batting line up thlir tel a target huphurhawm lo umin bul an tan tha. Captain che tha Rohit Sharma chuan a chetthat chhunzawmin run an siam chak a. Shubman Gill chuan run 53 siamin a thlawp a, a out hnuah Kohli a lut.
Kohli hian ball 97 hmangin 103 a siam a. Four runs vawi ruk vuak in 6 vawi li a vaw bawk a. India in chak tura run hnih an mamawh laiin 6 runs vua in hnehna a chanpui a, century a siam chiah bawk a ni.
Rohit Sharma chuan four vawi sarih vua in 6 vawi hnih a vua a, half century tlin lo chiahin run 48-ah a out thung.
India hi tun ICC Men’s Cricket World Cup-ah match li atanga vawi li an chakna a ni a. New Zealand nen table chung berah an awm chhunzawm.
Vuak thlang zawk Bangladesh in inhliam vangin captain Shakib Al Hasan an chhawr thei lova. Ball thar hmachhawnin an innings tir lamah run an la chak lo.
Mahse opener Tanzid Hasan leh Liton Das te an din dun rei hnuah bul an tan chhe lova, India bowler-te inthlahdah hman lovin an siam.
Tanzid a chhuah hnuah erawh a khat tawkin wicket an hloh reng a. India bowler te che tha rualin a bikin Ravindra Jadeja chuan batsman pawimawh Hossain Shanto wicket a lak bakah run 66 siam Liton Das wicket a la a. Innings tawp lama ding nghet tur wicket-keeper batsman Mushfiqur Rahim chu a catch out bawk.
Bangladesh hi match li khelh atang vawi thum an tlawmna a ni a. Match nga khelh hmabak an la neih avangin knockout stage beiseina erawh an la nei.
India chakpuitu Kohli chuan, “Team tana thawhhlawk nih ka duh a, World Cup-ah fifty ka nei nual tawh a, century erawh ka thleng lo fo thin. Chuvangin a tawp khar kha ka duh a, kan team-ah hian a tawp khartu ka lo ni fo tawh thin. Mahni fans te hmaah chuan a nuam zual bik hle.” a ti a.
India captain Rohit Sharma chuan, “Ravindra a kheltha hle a, mahse century chu a dan a dang. Hliahkhuh theih a ni lo.” tiin Kohli a fak.
- Match Summary
Bangladesh 256/8 (50 Overs)
Litton Das 66 (82)
Tanzid Hasan 51 (43)
Ravindra Jadeja 2/38 (10)
Jasprit Bumrah 2/41 (10)
India 261/3 (41.3 Overs)
Virat Kohli 103* (97)
Shubman Gill 53 (55)
Mehidy Hasan Miraz 2/47 (10)
Hasan Mahmud 1/65 (8