Aizawl: ZPM party chuan nimin khan an pisa-ah political session hun an hman rualin, ‘Power & Electricity’ tih thupui hmangin ZPM Consultant Er Lianlunga’n thu a sawi.
ZPM party Consultant Er Lianlunga’n ZPM chuan power-a intodelhna chu a policy ngaih pawimawh ber pakhat a nih avangin, power tha tak leh man man zawkin mipuite hnena pe chhuak turin theihtawp chhuahin hma an la dawn niin a sawi.
Nimina ZPM in chhung inkhawm an neihah ‘Power & Electricity’ tih thupui hmangin ZPM Consultant Er Lianlunga chuan thu a sawi a. State dang ngaihtuahin Mizoramin power a mamawh zat hi a la hniam fal hle chungin la khawpkham lohzia enin rualawh a nat thu a sawi.
Er Lianlunga chuan, tunah hian Mizoramin Hydro Electric (Own generation) 13 leh Solar plant pahnih a nei mek a, heng hnathawk thei project-te leh Tuirial Hydro project atangin a thlawnin power zaa 12, 6MW vel a hmuhte nen chawhrualin 36 MW vel siam chhuah thin a nih laiin, Mizoramin a hman tam hun lai a power a mamawh zat chu 120 MW atanga 139 MW vel a nih thu a sawi.
Power-a indaih lohna te phuhruk tur hian phai lam atangin power chawk luh thin a nih thu sawiin Er Lianlunga chuan, “ZPM chuan power-a intodelhna hi a policy ngaih pawimawh ber pakhatah a ngai a, power tha tak leh man man tak a mipuite hnena pe chhuak turin theihtawp chhuahin hma a la dawn a ni,” a ti.
Er Lianlunga chuan Mizoram chhunga Hydro electric project thar din belh zawnga sorkar ding laiin hmalakna a nei miah lo chu ZPM chuan pawi a tih thu sawiin, “Pathian zara ZPM a lo sorkar chuan developer-te hip zawngin a theih chin chinah project cost tihniam turin state budget atangin hmalak a ni dawn a ni,” a ti bawk.