Arsenal in mikhual team ni chungin Chelsea lakah point khat an sualchhuak a. Goal hnih chhuah tawh hnuah chhanglet ve ve in 2-2 in an inhnehtawk.
Stamford Bridge-ah Mauricio Pochettino pawlten tun season a an football tha ber tih ngam chu darkar khat chuang an khel thei a. Minute 15-naah Cole Palmer chuan William Saliba handball avanga penalty chawi atang goal a khung a. Blues in an phu ang ngeiin hma an hruai.
Second half tan hnu lawkah Mykhailo Mudryk-a’n ‘risk’ la a ball a pet chu Arsenal goalkeeper David Raya insiamrem hman lovin Blues in an goal hnihna an khung a. Mahni mualah team tha an hneh ngei dawn niin a lang hman.
Mikel Arteta pawlten nidang an football ang an khel lova. Ball an hloh nasat bakah chance tha insiam an harsat.
Minute 77-naah Chelsea goalkeeper Robert Sanchez chesualin a ball pek sual atang Declan Rice chuan Gunners tan goal a khung a. Beisei nei ngamin Arsenal in theihtawp an chhuah a, minute sarih hnuah substitute Leandro Trossard chuan an si phurh sutna goal a khung.
Chelsea boss Mauricio Pochettino chuan, “Pointy hnih kan hlohah ka ngai. Kan result a uihawm hle a, mahse inkhel erawh thlak danglam theih a ni lo. Season hmasa a champion chuh thei team lakah kan kheltha hle.” tiin a team a fak.
Arsenal boss Mikel Arteta chuan, “Chelsea an inremdan kha a fak loh theih loh. Nghet turin an inkhel a, keini lamin nidang kan pha lo bawk a, ball kan chanin kan hmang tha lova, chak duhna thinlung kan lantir lohlai a tam.” tiin a sawi ve thung.
Inkhel dang
Inrinni tlaiah Liverpool in Merseyside derby-ah Everton an mikhual a, 2-0 in an hneh.
Reds tan Mohamed Salah chuan Michael Keane handball atanga penalty an hmuh chu a khung a, huntawp dawnah an goal hnihna a khung ve leh.
Everton hian first half-ah Ashley Young chu yellow card a hmuh nawn avangin an chan a, Reds te an veng tluan thei lo.
Manchester United club legend Sir Bobby Charlton thih zanah United tan 2-1 in Sheffield United an hneh a. Scott McTominay leh Diogo Dalot ten goal an khung.
Karleha an hmachhawn tur Manchester City in Julian Alvarez leh Erling Haaland te hmanga goal khungin 2-1 in Brighton an hneh a. Huntawp dawnah an defender Manuel Akanji chu hnawhchhuah a ni.