Assam Cabinet chuan Zirtawpni zan khan thutlukna siamin an state-a fa pahnih aia tam neih loh policy an kalpui bawhzui nan fa pahnih aia tam nei chu sorkar hna thawh theih loh turin an ti.
Assam sorkar hian two-child policy a kalpui mek a, hei hi member 126 awmna state assembly chuan mihring pung chak lutuk ven nan kum hnih kal ta khan a lo pawm tawh.
He policy kalpui zel nan hian he thutlukna thar hi a siam a, January 1, 2024 atangin an hmang tan ang.
Assam sorkarin hetiang thutlukna an siam chhan lian ber chu ram leh hmanruain mihringte a chawm hneh tawh loh em vang a ni ber.
Tuna sorkar an hrawn mek hian inthlan dawn lai khan mipuite hnenah ram nei lote hnenah ram pek an lo tiam tawh a ni.
Fa pahnih aia tam neite sorkar hna an thawh theih tawh lohna tur a pawm bakah hian Cabinet chuan land policy thar a pawm bawk.
Hei hi ram leilung fa, ram nei si lote hnenah bigha 3 (43,200 sq. ft.)-a zau lo neih nan leh bigha chanvea zau in sakna tura pekna tur a ni.
He ram dawngtute hian kum 15 hnuah chauh an ram hi hralh phal an ni bawk ang.
September, 2017 khan Assam assembly-ah hian ‘Population & Women Empowerment Policy of Assam’ chu pass a ni.
He dan hnuaiah hian nu leh pate chu mihring pung zel tur ven nan leh an intodelh zawk nan fa pahnih aia tam neih lohtir an tum a, tuna la nei lo, sorkar hna thawk mekte pawh pahnih aia tam fa nei lo turin an ti bawk.