Hachhek Constituency Development Committee (HCDC) leh HOFPAR Business Solution tangkawp chuan Inrinni khan HYVE Aizawl City Hall-ah Hachhek thalai, Aizawla awm mekte tan Hachhek Youth Meet an buatsaih.
Hachhek Youth Meet-ah hian Hachhek bial mi, kawng hrang hranga hlawhtling thenkhatte nen thupui hrang hrang an sawiho bakah, HCDC-in bial tana hmalakna leh hmachhawp hrang hrang an lo neih tawh leh neih mekte an sawiho.
Inkhawmah hian HCDC Chairman Lalvansanga Pautu chuan thu sawiin, Hachhek thalaite chu Zoram khawvelah pawh an nep bik lo hle tih a sawi a. Mizoram State Assembly inthlanpui lo awm turah pawh bial tana an mi awh leh duh ngei thlang ngam turin kalkhawmte a chah.
HCDC chairman chuan Hachhek bial chu thenkhat chuan seat chuh kim nan mai mai atan hmang a, mipuite chu buma an awm a hlauhawm tih a sawi a. Mi dik leh tha thlang ngam tura kalkhawmte chahin, mahni khua theuha vote thlak tura an haw hunah pawh an duhthlanna thianghlim tak hmanga vote thlak turin a sawm bawk.