UN agency rualte chuan Gaza-ah nunau khawsak a buaithlak tak em avangin inkahhai puang turin a ngen.
Agency panga zingah World Food Programme (WFP) leh World Health Organization (WHO) pawh telin thuchhuah intawm an siamah Gaza dinhmun chu ‘a rapthlak hle’ niin an sawi.
Israel-in nasa zawka beih a tum thu a puan mek laiin UN hian inkahhai puang tura ngenna hi a siam a ni.
Inrinni khan puihna phur truck 20 chuan chawlhkar hnih chhunga a hmasa ber atan Egypt atangin an lut.
Mi tam takte erawh chuan Rafah crossing atanga puihna phurh luhte hi mamawhtu an tam tawh em avangin ‘tuifinriata thlak ang lek’ a ni dawn a, an inchan lo nasa dawn niin an sawi.
Indo hma kha chuan Gaza-ah hian puihna phur truck 500 chuang ni tin a lut ziah thin niin ActionAid Palestine thupuangtu chuan a sawi.
Gaza Strip-a cheng mi tam tak, mi maktaduai 1.2 vel zet hi mi puihna pek ringa khawsa an ni a, buaina a chhuah hnuah an pung niin UN chuan a sawi bawk.
October 7-a Hamas sipai pawlten Israel an beih thut hnuah khan Gaza hi phuba lak nan nasa takin a chhu zui a. Hamas chetna avang hian ,i 1,400 chuang an thi a, tam tak chu Gaza bula an chenna ina thah leh Israel chhim lama rimawi kût hmangtute an ni.
Israeli-ten Gaza an kah letnaah hian chawlhkar hnih chhungin Palestinian 4,300 chuang an thi tawh niin Hamas enkawl health ministry chuan a tar lang.
Israel hian Gaza Strip hi lei lamah pawh na takin a bei zui dawn nia ngaih a ni a; mahse, a hun hriat a ni lo va. Hetih mek lai hian Gaza hi lak ngei tumin an ram atanga ni tin mamawh an chawk luh thin a titawp vek.
Inrinnia puihna phurh luhte zingah hian damdawi, ei tur, tui leh kuang te a tel a; tuialhthei erawh a tel lo.
UN agency-te chuan naupang, nau pai lai leh kum upate chu an dinhmun derthawng zual an ni tih an sawi a. Gaza Strip-a cheng zingah a zahve dawn hi naupang an ni.
UN Development Programme (UNDP), Population Fund (UNFPA) leh International Children’s Emergency Fund (Unicef) bakah WFP leh WHO ten thuchhuah intawm hi an siam a ni.
Inkahhai puang tura an ngen bakah hian ‘Gaza-a mihring chet vel khuahkhirhna hlih’ an duh a, ‘puih hna thawktuten a hun taka civil mite hnen an thlen theih nan’ kawng hawn an duh bawk.
‘Gaza-ah hian mi maktaduai 1.6 chuang zet chuan puihna an mamawh tak zet’ niin an tar lang.
Gaza Strip hi mihring bitna hmun, Mediterranean Sea-in kil khata a hual leh hmun danga Israel leh Egypt ramten an hung hnan ani.
Mi maktaduai 2.2 chengin km 41-a sei, km 10-a zau a ni.
UN agency-te chuan, “Gaza hi tun hnaia buaina chhuah hma atang tawhin mihring khawsak a hniam em emna hmun a ni sa,” an ti a. “Tunah phei chuan a aia rapthlak a ni tawh,” an ti.
Inrinnia puihna an dawn mek lai hian Arab ram hruaituten Palestinian baihvai mekte Sinai peninsula-a luhtir chu an duh lo.
Cairo-a an intawhkhawmnaah Egypt President Abdel Fattah al-Sisi chuan inchin felna awm chhun chu Palestinian-te tana ram hran siam chauh a nih thu a sawi.
US Secretary of State Antony Blinken chuan Israel leh Egypt ramte chu Egypt atanga Gaza luhna, Rafah crossing chu puihna thilte thawn luh a nih theih nan hawng turin a lo ngen tawh a ni.