Aizawl : Congress party Vice President Lalnunmawia Chuaungo chuan, Mizoramah sorkar tha leh rintlak, mipui tuihalna tireh turin an party chuan hma a la dawn niin a sawi.
Zirtawpnia Bawngkawn South YMA Hall-a Aizawl North I Congress Conference a hmanpuinaah, Aizawl North I biala Indian National Congress (INC) candidate ni bawk Lalnunmawia Chuaungo chuan thalaite pawhin an theihna leh thiamna hmang ngeiin, hlim takin an tuina kawngah ngei ei an zawn theihna turin ruahmanna siam a nih tur thu sawiin, “Kum 5 chhungin thalai nuai khat tan eizawnna siamsak hi kan tum a ni,” a ti.
Lalnunmawia Chuaungo chuan, hlemhletna leh eirukna tih tawngkam Mizorama tlanglawn taka hman a ni chu pawi a tih thu sawiin, “He tawngkam hi umbo ka duh. Eirukna sual hi thu maia haw lo va, thil tih leh a tak taka haw turin Mizoram mipuite ka ngen a ni,” a ti bawk.
He hunah hian Lalthara, IAS (Rtd) leh Dr Vansanglura, Principal, Serampore College te’n thu an sawi a.
Kalkhawm te hian MPCC President Lalsawta kaihhruai Congress party an rintawk a, Congress party hian sorkar tha tak an siam tur thu te, Congress party sorkarna hmangin Mizoramin hmasawnna rahbi thar a tuk thei tih te leh, Aizawl North-I ah Lalnunmawia Chuaungo a tlin ngei theih nan tha thlah lova tang mar pat turin an intiam nawn thu bakah, Aizawl North-I mipui te MLA tha tak an neih theihna tura tanpui tura an sawm thute resolution an siam a ni.