ZPM Vice President Rev Dr K Thanzauva chuan Mizoramah Pathian ram a lo thlen a, a lo ngheh zelna turin ZPM hi a lo ding niin a sawi.
Hnahthial District Volleyball Court-a Inrinnia South Tuipui ZPM Block Joint Conference a hmanpuinaah Rev Dr. K Thanzauva chuan, “Pathian ram hi khawvelah Lal Isuan a lo din a; amaherawhchu, chu ram chu a la famkim lo va, riangvaite hnena chanchin tha hril tur leh, Pathian ram Zorama a lo thlen a, a lo ngheh a, a lo zau zelna tur leh a lo lan fiah deuh deuhna turin ZPM hi a lo ding a ni,” a ti.
ZPM sorkar a lo pian chuan MNF, Congress tih an sawi ve dawn lo tih sawiin, ZPM Vice President chuan, “Democracy innghahna, Abraham Lincoln-an a lo sawi thin zulzuiin ‘Kalphung Thar chu mipui sorkar, mipuite siam, mipuite tan’ a ni ang,” a ti bawk.
He hunah hian South Tuipui ZPM official candidate Jeje Lalpekhlua leh Aizawl West I ZPM candidate TBC Lalvenchhunga bakah AMC Corporator Christina Roluahpuii Sailo te pawhin thu an sawi.