Aizawl: Prime Minister Narendra Modi chuan Mizoram MLA inthlanpui atana campaign turin Mamit district a tlawh dawn a. Sorkarna siam zingah BJP an tel dawn a, Lalrinliana Sailo chu deputy chief minister dinhmun chelh thei tur a nih thu sawi a ni.
October 21, 2023 khan Mamit biala BJP party official candidate Lalrinliana Sailo leh Nagaland Deputy Chief Minister Y Patton ten Mamit district chhunga Nalzawl khua an tlawh a, vantlang inkhawm an buatsaih.
Inkhawmah hian Patton chuan Mamit biala BJP candidate Lalrinliana Sailo chu PM Modi pawhin a rin ngam em em a nih thu sawiin, “BJP hi sorkarnaah kan tel ngei dawn a, Pu Lalrinliana Sailo pawh hi keimah anga Deputy CM dinhmun chelh thei tur a ni dawn a, Deputy CM bial nih hi thil châkawm tak a ni, kawng chhe tak hi siam that thuai a ni dawn,” tiin, BJP candidate an thlang tling a nih chuan Krismas hmang turin Mamit bialah a lo kal leh tur thu a sawi.
Lalrinliana Sailo pawhin thu sawiin Nalzawl khaw kawng chu a rinphak baka a chhiat thu sawiin, “Tuna in khaw kawng hi min thlang tling a nih chuan thla ruk chhungin ka tender nghal ang. Hetiang khawpa sorkarin an lo hnuchhawn che u hi a mak ka ti hle a ni. Bial ka lo enkawl tawhah chuan an khaw kawng ka blacktop vek a ni,” a ti.
BJP a zawm chhan chu Mizoram leh hnam, sakhua a him nan leh ramin hma a lo sawn leh zual zawk nana hma lak a duh vang niin Lalrinliana Sailo hian a sawi a. “Min thlang tling a nih chuan Aizawlah leh Mamitah Bru House kan sa ang a, Eklavya School pawh kan hawng bawk ang a. Chu mi siam tur chuan central minister pawhin min thlawp thlap a ni,” a ti.
Mamit bial BJP candidate chuan a thusawite a tak tak a nih theih nan, October 30, 2023 khian Prime Minister Modi chu Mamitah a kal tur thu a sawi bawk.