Aizawl: Zotrek Adventure Club chuan khawvela sandstone cave thui ber, Krem Puri, Laitsohum, Meghalaya-a awm chu an lut dawn a. Inrinni khan puk lut turte hi Vana Pa Hall kawtah Aizawl Deputy Mayor R Thanglura’n a vai liam.
Zotrek Caving Expedition team hi mipa 20 leh hmeichhia 10, an vaiin mi 30 an ni a. October 23 leh 24 hian puk hi an lut dawn a ni.
Expedition Leader F Vanlalhriata sawi danin Shillong atanga km 56 vela hlaa awm, Krem Puri hi khawvel a sandstone cave thui ber niin, km 24.5-a thui a ni a. Kum 2016 khan hmuhchhuah a ni a. International expert team, scientist leh experience cave explorer rual, ram hrang hrang atanga kal khawmten February 5 atanga March 1, 2018 chhung khan survey neiin a puk hi an zir chiangin an teh chhuak a ni.
Survey an neih lai hian puk chhung atang hian kum makdatuai 66 kalta vela dinosaur ruhro nia hriatte pawh an hmu chhuak a. International team hian puk kawkel/passage survey hman loh tlem an nei a, Zotrek team hian a theih chin chinah luh chhuak an tum dawn bawk a ni.