ZPM Media chuan MNF party-in SEDP hmangin Zoram mipuite chiang taka bumah a puhin, MLA inthlanpui lo awm turah MNF party chu Aizawl bial 11-ah an artelukawn hial a rin thu a sawi.
Inrinni khan Aizawl Press Club-ah thu thar thehdarhtute a kawmnaah ZPM Media General Secretary Eddy Zosangliana Colney chuan kum 2018 inthlan dawnah MNF party chu chhung tin hnena SEDP Rs. nuai 3 sem an intiam tih sawiin, “Cheng nuai thum mai ni lo, nuai thum aia tam, NLUP dawng tawh zawng zawng pawhin an dawn leh vek tur thu MNF party President Pu Zoramthanga phei chuan uar takin a sawi,” a ti.
Tunah MNF sorkar term tawp dawn ta a, thla thar maiah inthlan a nih tur thu sawiin Eddy Zosangliana Colney chuan, “A nih leh chhung tinin Rs. nuai 3 chu an dawng ta em? Dawng lo. Kum nga chhungin chhungkaw tlem tê hnenah Rs 25,000 tetein an pe thei tawk. Chu pawh kum tawp dawnah, inthlan dawn hnaiah, election oriented tih hriat ngawih ngawihin an sem hram a, MNF party hian SEDP hmangin Zoram mipuite hi chiang takin min bum a ni,” tiin, Mizoramah chhungkaw 2,20,000 chuang hret awm zingah chhungkaw 60,000 bawr vel hnena Rs 25,000 den den pek hian MNF party a chhandam zawh loh tur thu a sawi.
Eddy Zosangliana Colney chuan kum 2018-a MNF an inzawrhna, an flagship programme berah pawh an hlawhchham chian em avangin kumin 2023 inthlan turah policy mumal sawi tur pawh nei ngam tawh lovin, ZPM leh ZPM Leader Lalduhoma beih chu an policy pui ber a nih thu a sawi bawk.
MNF chu an sorkar tirha ring taka an tlangaupui, mau chungchangte pawh an term tawp dawn lamah chuan an sawi ri ngam tawh lo tih sawiin, “An sawi ri khât tawh lutuk a, Brandisi leh Latiforus tih te pawhin lung a tileng lek lek hial zawk a ni. Mau avanga thla tin Rs 5,000 la lut an awm em? IAS bansante hi an lo awm reng em? Ram hi mumang leh duhthusam thamral leh mai mai tur nen a hruai chi a ni lo,” Eddy Zosangliana Colney hian a ti.
ZPM Media GC chuan mipuiin MNF an dinhmun an hrechiang a, candidate tura an duh, an mi sawmte pawhin dinna tlakah ngai lovin an lo hnar zel nia sawiin, “Aizawl South II-a ding tur phei chuan kohhran upa pathum an sawm hlawhchham thak niin an sawi a, an duh loh leh din nawntir an tum tawh loh chu seat dah ruah tawp aiah an din nawntir leh mai mai a ni,” a ti a. MNF tlinna tur bial hi ngaihtuah vang vang pawh hian a vâng hle a, Aizawl bial 11-ah phei hi chuan an artelukawn hial a rinawm tih a sawi.