India leh Canada inkar khilna bul ber, Hardeep Singh Nijjar-a hi India hmar lam, Punjab-a Jalandhar district-a piang a ni a. A tlangval lai, kum 1997 khan Canada-ah pemin nupui a nei zui a, fapa pahnih a nei a, plumber a ni.
British Columbia province-ah a inbengbel a, Sikh mite tana ram hran siam a nih theih nanabeitu, Khalistan din a nih theih nana aw thawhtu langsar tak a ni a. India-ah hian Sikh hi sakhaw zuitu tlem niin mihring cheng zinga 2% emaw chauh an tling phak.
India chuan ‘mi firfiak’ tia sawiin dan pawla a hnawl hel pawl, Khalistan Tiger Force (KTF)-ah thuk takin a inhnamhnawih niin an sawi.
Thah a nih lai hian kum 45 mi niin kawr dum, lukhum nei inbel mipa pahnihin Vancouver daiah June thla khan Sikh temple bulah an kap hlum a. A hmutute chuan a pickup truck hma darthlalang tlangin an kap niin an sawi a, ama khalh lai niin an sawi bawk.
Silai hmet puaktute hi an tlanchhe zui nghal a, Nijjar-a pawh a hmunah a thi nghal bawk a. Canadian intelligence service-te chuan thah a nih hma hian amah thah tum an awm niin an lo hrilh lawk tawh nghe nghe.
Canada-in a chhuinaah a thahnaah hian India a inrawlh mai thei nia an sawi chuan ram pahnih inkar a tichhe ta a, Delhi chuan a pha nasa hle.
Kum 2007-a Canadian khua leh tui nihna nei, Nijjar-a hi a lamtangte chuan muanawm taka British Columbia-a Sikh mite tana beitu mai a nih thu leh a hnampuite tan pawha mi tha tak a nih thu an sawi bawk.
Surrey Gurdwara kawngkapui bulah a hriat rengna siam niin he hmunah hian president nihna chelh mektu a ni a, a vuinaah pawh mi tel an thahnem hle.
India-ah chuan Terrorist Act hmangin man duh zingah telh a ni a. Kum 2007-a Punjab-a cinema bomb-na, mi paruk an thihna leh mi 40 hliam tawrhna leh kum 2009-a Sikh Indian politician Rulda Singh thahnaah inhnamhnawih nia puh a ni.