Formula 1 world champion ni chiang tawh Max Verstappen chuan parukna atangin bul a tan chungin hnehna a chang thova. A tan erawh intlansiak awlsam ni bik lovin United States Grand Prix-ah a tlan chak ber.
Pathianni zana Austin, Texas a Circuit of the Americas a intlansiakah Mercedes car khalhtu Lewis Hamilton chuan a tawp lamah a um pha teuh a, lap khat dang la awm belh se brake lama harsatna nei Verstappen hi a umpha ang.
McLaren car khalhtu Lando Norris chu pathumna a ni a. Nimahsela intlansiak zawhah Lewis Hamilton leh Ferrari car khalhtu Charles Leclerc te car chu endik an nih hnuah F1 technical dan an tlin loh avangin disqualify an ni a. Norris hi pahnihnaah a chho.
- Intlansiak chu
Tun kartawpah Inrinni zan sprint race a awm dawn avangin free practice vawikhat chauh neih a ni a. Kilometre 5.513 a thui tlankawngah team-ten car enchhinna hun an nei tam lo.
Mercedes in an car upgrade thar an hmang a, beisei an nei sang.
Hetihlai hian Red Bull Racing bawk an car a chak ber tih a chiang a, qualifying-ah Verstappen-a’n tihsual a neih avangin Leclerc chu pakhatna nimahsela Sprint Race-ah Dutch driver a tlan chak ber.
Intlansiak pangngaiah Red Bull um turin Mercedes an tlanchak a, McLaren nen um thei ber an ni dawn tih a lang thuai.
Intlansiak tir lamah Norris leh Hamilton inum a hmuhnawm a, mahse Verstappen-a’n lap 29-naah hma hruaiin a tawp thlengin a hum tluan a. Formula 1-ah a vawi 50-na atan hnehna a chang.
- Disqualify chhan
F1 danah intlansiak zawhah car endik an ni thin, Pathianni zanah car pali thlan chhuah zingah Hamilton-a Mercedes leh Leclerc-a Ferrari te an tel.
An car chhuata a hniam lutuk tur vengtu ‘skid block’ chu danin a phal chin bakin a hniam tih hmuhchhuah a ni a. Hei vang hian pahnihna leh parukna a tlan thleng driver-te disqualify an ni.
Team pahnihte hian an tihsual chhan sawifiah ve ve in sprint race avanga car enchhinna hun an nei rei lo chuan an inbuatsaihna a nghawng a, an car chu dan angin a tling lo ta a ni tiin an sawi.