Aizawl: Special Judge, POCSO Act chuan a fanute pathum kumtlinglo vawi tam pawngsual thintua puh, kum 46 mi chu kum 21 jail tang turin a hrem.
Thubuai ngaihtuahtu, Special Judge (POCSO Act) leh District & Sessions Judge, Lunglei Judicial District Vanlalenmawia chuan nimin khan pawngsualtu hremna hi a puang a, Sec 6 POCSO Act, 2012 hnuaiah kum 20 tang tur leh Rs. 10,000 chawi turin a ti a, a chawi theih loh chuan ni 20 atan belh ang a. Section 506 IPC hnuaiah kum khat tang turin a rel bawk a, a vaiin kum 21 a tang dawn a ni.
Court-in kum 21 jail tang tura a hrem tak hi hun rei tak Chin National Army-a lo tang tawh niin, hriat danah chuan a nupui hi Bru hnam a ni.
Court-in thuremna a tihchhuaha tar lan a nih danin Lawngtlai district chhung khaw pakhata a nupui awm loh hlanin a fanu pathum – kum 12, kum 10 leh kum sarih te chu a pawngsual thin a, naupangte hian an pa chet dan an nu bula an thlen hnuah August 5, 2022 khan Lawngtlai Police station-ah FIR a theh lut a, August ni 10 khan man a ni.