November 7-a Mizoram Legislative Assembly inthlan atana hming pe lutte inhnuhdawh theih hun chu a tawp ta a, inhnukdawk an awm lo a, kumin MLA inthlanpui neih turah hian candidate 174 an awm dawn ta a ni.
Election Commission of India (ECI)-in ruahmanna a siam angin MLA inthlanna neih tura chuh tum, hming pe luttute inhnuhdawh theih hun chu nimin thleng kha a ni a, hming pe lut mi 174 zingah inhnukdawk an awm lo a ni.
MLA inthlanna neih tura hming pe lutte chu October 21 khan endik a ni a, hemi ni hian mi 173-te chu pawm an ni a, nomination paper-ah thil fel tawk lo a awm avanga a tuka endik nawn, Lawngtlai East biala ZPM candidate tura nomination thehlut, Dr Lorrain Lalpekliana Chinzah pawh pawm leh a ni.
Tar lan tawh thin angin inthlan chuh tura hming pe lut pawm takte hi an vaiin mi 174 an ni a. Candidate 174 zingah mi 158 chu mipa niin, hmeichhia 16 an awm a. Party pathum – Mizo National Front, Indian National Congress leh Zoram People’s Movement (ZPM) ten bial awm zawng zawng, 40-ah candidate an nei.
Party dang, Bharatiya Janata Party (BJP) chuan bial 23 atana nomination an theh lut a, Lalpa Chhiahhlawh Intelkhawm hming invuahten independent-a dingin bial 21-ah candidate an nei a, anni bakah independent-a chuh tur mi paruk awm belhin, independent candidate hi an vaiin mi 27 an awm a ni.
Candidate tamna ber bialte chu Aizawl North III, Aizawl South I, Serchhip leh Lawngtlai West-ah te niin candidate paruk theuh an awm a. Candidate pathum neiha bial mala candidate neih tlemna ber bialte chu Tawi, Champhai South, East Tuipui leh South Tuipui te an ni.
Ruahman lawk dan chuan November 7, 2023 khian vote thlak a ni dawn a, December 3, 2023 hian vote tlate chhiar a ni ang a, inthlan kaihhnawih zawng zawng hi December 5, 2023 hmaa zawh fel vek tura tih a ni bawk.