Mizoram MLA inthlan lo awm tura inbuatsaihna kal mekah Kolasib district chhunga inthlan nia inthlan vil tur Micro Observer atana ruat te tan nimin khan Kolasib DC conference hall-ah training buatsaih a ni a. Kolasib District Election Officer John LT Sanga’n telpuiin, Micro Observer atana ruat te chu an mawhphurhna pawimawh zia hriaa, fimkhur taka hnath- awk turin a chah.
Training-ah hian Kolasib district chhunga MLA bial pathum atana Micro Observer-a ruat mi 10 an tel a. State level master trainer Lalremruata Sailo, Sub-Divisional Officer (Civil) Vairengte-in training pein, Micro Observer-te hna thawh dan tur leh report pek dan tur leh EVM hman dan te an zirho a. Zawhna leh chhanna leh sawihona hun an hmang bawk.
Nimin vek khan Champhai-ah Champhai district-a polling official te duty na tur siamrem thawhhnihna neih a ni a. Champhai district-a inthlan duty turin polling party 102 siam niin, polling party pakhatah mi 4 – Presiding Officer, Assistant Presiding Officer leh Polling Official 2 zel awmin, a vaiin mi 408 duty tura ruat an ni.
Duty na tur siamrem thawhhnihnaah hian polling party te duty na tur Assembly bial leh an duty pui tur team te thlanchhuah fel an ni a. Polling station an duty na tur a thawhthumna ah thlan chhuah leh a ni ang.
Inthlan duty na tur siamrem thawhhnihnaah hian Champhai North leh Champhai South biala General Observer Dr Ranjit Kumar Singh, East Tuipui bial General Observer Sanjay Kumar bakah Champhai DEO James Lalrinchhana leh political party hrang hrang aiawhte an tel a ni.
Khawzawl-ah pawh nimin vek khan General Observer Amit Singh Bansal hovin inthlan duty tur te siamrem thawhhnihna neih a ni a. Khawzawl district huam chhungah bial pakhat Tuichang bial chauh a awm avangin polling official te team awmna tur a chiang nghal a. November ni 5-a siamrem thawhthumna neih turah polling official te duty-na tur polling station tihfel a ni ang.