Aizawl: MZP Headquarters, Lunglei chuan hnam dang pasal nei candidate an dodal kawnga MZP Gen Hqrs hmalakna an thlawp thu an sawi.
Thawhtannia MZP Hqrs, Lunglei-a OB thukhawm chuan MLA inthlan lo awm tura hnam dang pasal nei, Lunglei South-a INC candidate Meriam L Hrangchal chungchang an sawi ho a. Hnam dang pasal nei candidate-a dah luih a nih chungchangah MZP Gen Hqrs, Aizawl hmalakna a thlawp tlat a, an hmalak leh zelna turah theihtawp a chhuahpui zel dawn niin an sawi.
MZP Lunglei chuan political party tinte MLA election lo awm tura hnam dang pasal nei candidate-a dah lo tura a ngenna Congress party-in zah lova a dah lui chu pawi an tih thu leh tun hnuah thleng nawn tawh lo se an duh tih an sawi.
MZP Headquarters: Lunglei huam chhung, Lunglei South constituency-a MZP Sub-Headquarters leh branch-te chu MZP hmalakna lo tawiawm a, hnam dang pasal neiin ram rorelna chelhtu an nih loh nan theihtawpa hma lo la turin an ngen a, “MZP chuan ram leh hnam himna tur a ngaihtuah thin a. Kan ram leh hnam a him loh chuan tumah kan him bik dawn lo,” tiin, MZP hmalaknate chu Mizo mipuite tawiawmna leh thlawpna an ngen.