Juventus in Serie A hnehna pawimawh an chang a, AC Milan nen inkhelin Manuel Locatelli goal khung hmangin 1-0 in an chak.
San Siro a Pathianni zan inkhelah hian Milan in halftime dawnah defender Malick Thiaw chu red card a hmuh avangin an chan a. Minute 63-naah Italy midfielder Locatelli chuan Juventus chakna goal a khung.
First half-ah inkhel a rang lova, team pahnihte an fimkhur. Juventus tam zawk an nih hnuah erawh an chungnung a, goal hlauhawm erawh siam an harsat a, an siam chhun erawh Milan keeper Antonio Mirante chuan a dansak fo thin.
Juve manager Massimiliano Allegri chuan tam zawk an nihna an chhawr tawk lo niin a sawi a. “Player 10 laka khel kan nih hnu khan second half bul kan tan tha lo. A tawp dawn lamah dawhtheihna kan nei lova, Milan kha counter-attack kan neih tir fo bawk. Goal khat a hmahruai kan duhtawk ringawt a nih chuan season hlawhtling kan hmang lovang.” a ti.
Inkhel dangah AS Roma in a zawna league match vawi thum nan hnehna changin 1-0 in Monza an hneh.
Stadio Olimpico-ah halftime hma deuhin Monza in Danilo D’Ambrosio chu red card avangin an chan a. Second half-ah Roma chelh hram tum mahse Stephan El Shaarawy chuan Roma chakna goal a khung.