Tripura State Rifles (TSR) sipai 29-te chuanna truck chu Pathianni zan tlai tawh takah khan Baramura Hills huam chhung, West Tripura district-ah chesualin sipai 13 chu na takin an inhliam a. He thil thleng hi eptu party, CPI(M) chuan chetsualna pangngai ni lovin an chetsual hma lawk hian helhovin an bei a, an chetsual phah nia sawiin an dem hle.
Heng sipaite hi TSR 8th battalion-a mite niin Agartala-a duty tura kalte an ni a. “Lirthei khalhtu hian Bankumari huam chhung, Baramura Range, Teliamura sub-division-ah, Agartala atanga km 30 chauhva hla tawhah thunun zo lovin kawng thlang kawrah a tlan lut a. Thi an awm lo va, a chuang 29 zinga 13 erawh an na hle a, damdawi inah dah luh an ni,” tiin SP Krishnendu Chakravertty chuan a sawi.
Hetih lai hian CPI (M) chuan TSR chuanna lirthei hi helho beihna avanga chesual zawk niin an sawi a. An party thupuangtu, Goutam Das chuan Facebook-ah he thu hi tar langin, “TSR sipaiten Baramura Hills-a beih an tawk hi ka dem tak zet a. Helhovin an lirthei hi eng emaw hmangin an vawm a, an chetsual phah ta a ni,” a ti.
Tripura Pradesh Congress pawhin he thil hi chhui chian an phut a. An vice president Tapas Dey chuan an chetsual chhan chu helho vang a ni em tih hre lo mah se chiang zawka chhui ngei a duh thu a sawi a. Hliam tuarte enkawlna senso chu sorkarin tum se a duh thu leh an dam fel hma chu chawlh laktir turin a duh thu a sawi.
Police-te erawh chuan eptu party-te puhna hi an pha thung.