ZPM chuan nimin khan an pisaah chhung inkhawm an hmang a. He huna thu sawitu, ZPM Consultant F Rodingliana’n kum nga chhungin Mizoram mamawh zat kawlphetha thar chhuah hman ngei an tum thu a sawi.
Lengteng biala ZPM candidate ni bawk, F Rodingliana chuan Mizoram kawlphetha a siam chhuah ve leh Tuirial HP atanga zaa 12 state-in a chante bakah mipuiin kawlphetha chhit man a chhunkhawmte nen, a vaiin kum khat chhung (2018-2019) a sorkarin a sum hmuh chu Rs 88,41,08,880 a ni a. Hei bakah budget atang leh state-in cheng tam taka a la pui chungin mipuiah kawlphetha chhit man sorkarin a tito telh telh zawk chu mipui hnenah sawifiah tura a phut thu a sawi.
Mizoram sorkarin India Energy Exchange (IEX) atanga power a lei dan thlirin, unit khat zelah Rs 1.09 atanga Rs 3.90 inkarte a ni a, power a lei tona ber chu Bongaigaon niin, unit khat zelah Rs 7.18-in a lei tih sawiin F Rodingliana chuan, “An leina to ber mil hian mipuiah min bill ta em ni tih chu mipui nawlpui tan chuan hriatthiam a har hle. Heng bakah hian sorkarin kum tin budget-ah cheng vbc za tel a pe kum tin bawk nen, ngun taka kan ngaihtuahin ZPM chuan mipuiah tihpun ngaiin kan hre lo a ni,” tiin, sorkar hian mipui hi êng chhit man hmang hian sum siam nan a hmang zawk em ni tih a awl hle niin a sawi.
ZPM Consultant chuan, Lungleng rama khuah an tum Tlawnglui phase (1) 54 MW hi power siamna mai bakah, Aizawl khawpuiin tui thianghlim a neih theih nan te, khualzin hip nan leh sangha khawi nan a remchang hle tih a sawi a. Matlui pawh 70 MW pe chhuak thei tur te, Thiltlang bulah Tuichang phase (1) – 24MW leh phase (2) 54 MW pe chhuak thei turte, Ngopa bulah Tuivai Phase 1 atangin 100 MW pe chhuak thei tur niin, kumin inthlanpuiah ZPM-in Pathian leh mipui zara thlan tlin an nih chuan an hmalakna turah an chian thu leh, hma chak taka an lak nghal tur thu sawiin, “Kum nga chhungin Mizoram mamawh zat kawlphetha thar chhuah hman ngei kan tum dawn a ni,” a ti.