Aizawl: Mizoram Secular Alliance hruaituten nimin khan Congress Bhavan, Lungleiah thuthar thehdarhtute an kawm a, Kristian sakhua leh Mizo hnam tana tha lo BJP do a tul thu an sawi.
MPCC General Secretary John Siamkunga chuan, BJP-in dan dik tak hmang chung si a, Mizo leh hnam hnufual dangte a nekchep zawnga hma an la mek tih hre chiang a, BJP leh anmahni thurualpuitu te chu Mizo mipuite hian tanruala hnawl a tul thu a sawi.
John Siamkunga chuan, BJP hian Parliament Special Session neih zawh takah M.P. te hnena India Constitution chhut thar an semah chuan Secularism leh Socialism tih chu paih a nih tawh thu a sawi a. CAA leh UCC chu kum 2024 inthlan hmain pass an tum tih Modi ngeiin a sawi nia sawiin, “Hei hi an pass phei chuan hun reiloteah Mizoram pawh hi Hindu lal ram a ni thei a. Hemi laka kan him theihna turin Mizote kan tanrual a ngaih em em lai a, BJP lamtang leh thawhpui mai hrehlo Mizoram atang bawka an awm hi a pawi takzet a ni,” a ti.
Mizoram inthlanpui lo awm turah pawh BJP chuan Prime Minister Modi hovin beihpui an rawn thlak dawn tih sawiin John Siamkunga chuan, India hmarchhak state dang zawng zawng pawh BJP hian an thunun tawh tih a sawi a. Mizoramah pawh state chhunga tualto party te hmang ngeiin BJP hian thuneih an rawn tum a, state panga inthlanpui lo awm turah state pathumah BJP lam tang an chak chuan India ram chu sakhaw zalenna awm lohna ramah a awm dawn avangin, sakhaw zalenna ram a nih zel theih nan Congress party vote turin a sawm.