India chuan September thlaa ram pahnih inhmuh thiam lohna avanga a chawlhsan tawh, Canadian-te tan visa service chu a chhunzawm leh ta tih Ottawa-a High Commission chuan a sawi.
Visa pek chhuah a tihtawp dawn khan India hian Canadian mission-ah ‘tihthaihna an tawn’ vangin hna a thawh a buai phah niin an sawi.
Hetih lai hian Canada-a Sikh inlak hran tuma beitu pawl hruaitu thihna avanga an inhnialna avang zawk nia ngaih a ni.
Ottawa chuan he tualthihnaah hian India a inrawlh thei niin a sawi a, New Delhi chuan phain ‘thil awm ang lo lutuk’ niin a sawi thung.
Nilaini khan thuneitute chuan an mission-a venhimna lam dinhmunte an ennawn hnuah visa an pe chhuak leh tan dawn tih an puang a ni.
Thuchhuah an siamah ‘an thutlukna hi inbiakna leh inrawn tawnna a awm angin’ thil an kalpui niin an tar lang bawk.
Ningani atang hian dan pangngaiin an kalpui tan leh dawn nia sawi a ni a, zin phalna, sumdawnna leh damdawi mamawhna thil bakah conference visa pawh pek chhuah tum a ni.
Entry visa an tih bik hi ‘Indian chhul chhuak chauh’ leh an fate tan chauh dil theih niin Toronto-a Consulate General of India website chuan a tar lang a. India khua leh tui chhungkhatte a ni bawk.
Canadian khualzin hrim hrimte tan pek a ni ve dawn em hriat a la ni lo va, anni hian tourist visa an mamawh a ni.
India leh Canada inkar hi Prime Minister Justin Trudeau-a’n Canada-in an chhuinaah Surrey, British Columbia-a June thlaa Sikh inlak hran tum hruaitu, Hardeep Singh Nijjar-a thahnaah India a inrawlh thei nia a sawi atanga khi tan a ni.
Thah a nih lai hian police chuan ‘tum bik neia mi thahna’ tiin an sawi a, an rinhlelh erawh engmah an sawi lang lo.
Trudeau-a hian he tualthahna chhuinaah hian India chu pui turin a nawr a, Canada chuan India nena inkar tihkhik a tum lo niin a sawi.
Canada hian tun hnaiah India-a a palai thahnem tak a ko haw a, hei hi India-in la chhuak tura a tih vang a ni.
India chuan Ottawa-a palai a dah zat aiin Canada-in Delhi-a a dah chu an tam zawk daih niin a sawi a, intluktlanga awm a phut a ni.
Hetih lai hian Global Affairs website chuan Ottawa-a Indian palai awm hi Delhi-a awm nen a inzat deuh reng niin a sawi bawk.
Tunah hian India-ah Canadian palai 21 an la awm mek.