Tun hnaia India hmarchhak state hrang hranga ruah nasa tak sur avangin Tripura-ah chuan mi 739 vel chu chenna in nei lovin an awm mek a, relief camp eng emaw zatah Zirtawpni atang khan an awm khawm.
Ruah sur avanga nunna chân erawh an awm lo nia hriat a la ni rih a. “North Tripura, Unakoti leh Dhalai district-te chuan an tuar na zual,” tiin State Disaster Management Authority-a an hotu, Sarat Das chuan a sawi.
State Emergency Operations Centre (SEOC)-in a chhinchhiah dan chuan mi 739 chu relief camp hrang hrangah an awm mek a. An zinga mi 358 hi Unakoti district-a mi niin mi 381 chu North Tripura district-a mi an ni thung.
Tun hnai ruahsur nasa avang hian chenna in 1,039 a chhia a. State revenue department chuan a tul apianga hman tur leh mipui thiar nan lawngleng 40 a thawh chhuak a. “National Disaster Response Force (NDRF) leh Tripura State Rifles (TSR) chuan chhanchhuah hna hi an thawk mek zel a ni,” tiin Das chuan a sawi.
Thli a tel deuh bawk avangin hmun tam takah thing leh electric ban a tlu nasa hle bawk a. Unakoti district-ah chuan Manu lui chu Inrinni chawhnu atang khan hlauhawm chhinchhiahna chung lamah a luang tan bawk.
MeT department chuan ruah sur leh thli hi nimin thleng khan thawk tur leh vawiin atang chuan khua a tha tawh tura an ngaih thu an sawi.