Aizawl : Saiha MLA bial leh Palak bial Expenditure Observer Dev Pra- kash Bamanavat hovin nimin khan Expenditure Monitoring Team-te an thukhawm a. MLA inthlan lo awm tura candidate te sum chet vel dan vil chungchanga pawimawh hrang hrang te an sawiho.
Expenditure Observer chuan inthlanna felfai leh tha tak nei turin thawhhona tha a pawimawh tih a sawi a. Candidate te sum sen zat lo chhinchhiah chu hna pui bera neih a tul thu sawiin, expenditure lama thawk zawng zawng te chu theihtawp chhuah turin a chah.
Record felfai leh dik tak neih a tul thu pawh Dev Prakash Bamanavat chuan a sawi a. Chutiang tur chuan inpekna tak tak neih a tul thu sawiin, harsatna leh hriatthiamloh nei te chu a hnena thlen thin turin a chah bawk.
He thutkhawmah hian Expenditure Monitoring Team te an tel kim a. Sum senna hrang hranga hriatthiamloh an neih te bakah hriatchian duh an neih te Expenditure Observer chu an zawtfiah nghal a ni.