Khualzin hipna lama hmalak zelna atan Airport Authority of India (AAI) chuan India rama a hmasa ber turin Assam-a hmun pathumah tui thlawhna (aerodrome/seaplane) thlawhtir a tum.
AAI Regional Executive Director Sanjeev Jindal chuan hemi chungchang hi nimin khan sawiin, “Ram puma ngun taka zir a nih hnuah water aerodrome/seaplane hi Assam-a hmun pathumah hman tum a ni a. Hei hi khualzin hipna tur leh inkalpawhna lama hmasawnna tura ruahman a ni a. Assam-a lui pathum chu India-a a hmasa ber atan thlan a ni,” a ti.
“Nakum kumtawpah emaw, kum 2021 kumtirah emaw water aerodrome/seaplane service hi Brahmaputra lui leh Umrangso tuikhuahah chuan kalpui tan hman tum a ni a. Hmun thum thlante hi Guwahati, Umrangso (Dima Hasao district) leh Kaziranga National Park te an ni,” an ti.
Jindal hi kar hmasa khan Agartala tumhmun duan thar, Rs. Vbc 500 senna tur sak mek tlawha lo zin a ni a. Assam-a seaplane service siamna tur hian sum tam vak a ngai dawn lo tih a sawi.
“A tum theihna tur Rs. Vbc 50 vel sengin hmun thumah siam a ni ang a. A bak hna tenau dang neuh neuh erawh thawh tur a awm ang a, thlawhtir hmaa peih vek a ni ang,” a ti.
Jindal chuan, “Seaplane emaw, amphibious plane emaw, a tum leh thlawh chhuah theihna tur tuipui awl zau a awm hian water aerodrome a ni mai a. Terminal building thleng turin lawngin a chawlhna a pan angin a khalhtuin a panpui leh mai dawn a ni,” a ti.
Water aerodrome leh seaplane service an tih hi tun hnaia tihthar, UDAN (Ude Desh ka Aam Naagrik) scheme hnuaia tih tur a ni a, he scheme hi hmun kilkhawrte thlawhna hmanga tlawhpawhna siamna tur a ni.
SpiceJet chuan seaplane operation hi enchhinna angin Ahmedabad leh Mumbai-ah a kalpui mek.
India rama a vawi khat nan Prime Minister Narendra Modi hian seaplane hi Ahmedabad-ah December, 2017 khan zin nan a lo hmang tawh.