Aizawl : MNF party chuan thuchhuah siamin, tun hnaiah India ram BJP hruaitute Mizoramah lokalin, inthlanpui lo awm turah campaign rusum an thlak nasa hle tih tar langin, “Mizorama sorkarna chang mektu MNF party chu vawiduai lo rawn sawichhiain, hmelma enin min rawn en a ni ber,” an ti.
Inrinnia an thuchhuahah MNF chuan, BJP hruaitute’n ‘Pathian leh kan ram tan’ titlattu, sakhaw tih bik nei MNF sorkar an nihzia an hrechiang hle nia sawiin, “Ram leh hnam kaihhruai hna kan thawhna kawngah hnawk min ti hleah kan ngai,” tiin, India secular state hnuaiah sakhaw humhim tura hnam party an nihna anga an chetzia an hmuchiang hleah an ngaih thu an tar lang.
MNF chuan sakhaw zalenna hnuaiah rinna dang kalpuitute Mizoram chhungah nekchep chuang lo va, zalen taka khawsak hona karah ram neitu rilru nena MNF in sorkarna an kalpui chu, Hindu sakhua leh rinna tundin tum tlat BJP party tan chuan a hnawk em em reng a ni, an ti.
Mi tam takin MNF leh BJP chu thawk dun leh inmawngzawm ang hialin sawi thin mah se, BJP hotute chetzia leh khawsak phung hian an thawhho loh zia leh an inzawm lohzia a pholang chiang hleah an ngaih thu tar langin, “Thawhpui an tum leh biakrawn an neih mek chu rawn bei ve hauh lo vin, an tan bengchheng hauh lo vin, ZPM tan kawng an hawn sak mekah kan ngai a ni,” MNF thuchhuah chuan a tar lang bawk.