Aizawl: MNF Media & Publicity hotute chuan NDA kaihruaitu BJP-in MNF leh Mizoram sorkar chu ralpui phiara phiarin na takin an bei tih an sawi a. BJP leh a puanhnuai sangawizawnpuite chu vulh lena an awm palh an hlauh thu an sawi bawk.
Thawhlehnia Aizawl Press Club-a thu thar thehdarhtute kawmin, MNF Media & Publicity General Secretary VL Krosshnehzova chuan Manipur buainaa Manipur BJP sorkarin police leh Meitei firfiakte hmanga Zo hnahthlakte nuai chimih an tum chu duh lovin MNF MP pahnih, C. Lalrosanga leh K. Vanlalvena ten Zo hnahthlakte tawrhna chungchang parliament-ah sawi an tum chu vawi khat mah phalsak an nih loh bakah NDA MP-te inhmuhkhawmnaah pawh sawi an remtih loh avangin inhmuhkhawmnaah an tel loh phah tih a sawi.
VL Krosshnehzova chuan Manipur chungchanga eptu tangrualin NDA sorkar rintawk lohna an put luh pawh Lok Sabha-ah C. Lalrosanga chuan a thlawp thu te, Forest Conservation (Amendment) Bill, 2023 pawh MP pahnihten dodal mai ni lovin Mizoram assembly-ah dodalna official resolution a pu luta pawm a nih thu a sawi.
Hnamin tihdan phung an neih leh sakhua pawh dinhmun derthawnga siamtu tur, Uniform Civil Code (UCC) pawh MNF chuan duh lo vin, MP-ten an dodal bakah CM/Party president ngei pawhin hemi chungchang ngaihtuahtu. National Law Commission-ah Mizoram leh mipuiin an duh lova an dodal thu a thlen thu a sawi bawk.
Party dangten MNF an sawiselna thin, Citizen Amendment Bill pawh MP-in a thlawp zawnga vote a thlak chhan Mizoram leh hmarchhak state-ah te hman a nih ve dawn loh thu tihchian a nih tak avang chauh a nih thu a sawi a. Myanmar ram chhung buaina avanga Zo hnahthlak raltlan rawn lutte pawh NDA sorkar chuan thawnlet vek turin Mizoram sorkar hnena thu a pek pawh hnawlin, state sorkar sum atangin Rs nuai 380 hmangin tuamhlawm a nih thu a sawi a. Bangladesh atanga Zo hnahthlak raltlante pawh BSF-ten Mizorama luh an phal loh pawh a tuamhlawm mek niin a sawi.
VL Krosshnehzova chuan, Manipur atanga Zo hnahthlak raltlan te pawh Mizoram sorkar erawh chuan ama sumbawm atangin Rs vbc 5 hmangin a tuamhlawm mek tih sawiin, “Manipur-a Zo hnahthlak unaute thlavang hauha MNF-in huai taka a chet ngam laiin, ZPM hian an tana thu leh hla an neih leh, tha leh zung an sen thawm hriat tur a awm mang hauh lo,” a ti.
NDA-a MNF a tel ve chhan chu BJP nena inzawm vang ni lovin Congress duh leh duh lo intelkhawm pahniha Congress duh lo lama tel mai an nih thu a sawiin, “NDA thuhnuaiah a awm lo va, issue-base zela kal a ni. Mizoram tana tha lo an tih chuan a dodal mai a, a dodal zel dawn,” a ti.
MNF Media & Publicity GS chuan NDA kaihhruaitu BJP-in an duh dan ang anga MNF leh Mizoram sorkar hi a ti thei lo tih an hriat chian tawh avangin, tun inthlanpui lo awm turah hian MNF chu ralpui phiara phiarin na takin a bei ta tih sawiin, “An khingpui ber, Congress chu eng ruai an ni dawn lo tih a hmuh avangin an bei lem lo va. ZPM phei chu engtin mah an bei lo va, hei hian BJP leh ZPM hi puan an inzawna, hnungthak an inhiahtawn tih a tichiang hle,” a ti.
Tun hnai maia ZPM candidate ten sum an uilo thar hle tih pawh a ri ring ta hle tih sawiin, “Mizo mipuite hian kan unau harsatna tawk mekte la tah vawng vawngna tur hian BJP leh a puanhnuai sangawizawnpuite hi kan vulh len palh kan hlau takzet a ni,” tiin VL Krosshnehzova’n a sawi.