Karhmasaa A chanchin ziahan lehkhabu thar, ‘The Woman in Me’ tichhuaktu Britney Spears hian a lehkhabu atanga sum engzat atam nge a lakluh ang, tih rimawi khawvela zawhna langsar tak a ni mek.
‘Princess of Pop’ ni bawk inpuanna mak leh dangdai tak tak awmna bu hi milar chanchin ziahna lehkhabu zinga hralh kal leh hralh tla ber ni turin a dinhmun a tha viau tawh nghe nghe.
Tlangzarh ni hnih khat khan copy 400,000 chuang a ral duak nghal a, copy engzat a tamin nge zui leh dawn tih sawi ngaihna pawh a awm lova, eng emaw zat an chhut belh reng dawn tih erawh a chiang hle.
Khai le, tunah chuan Britney hian a lehkhabu hralh atangin sum engzat nge a lakluh ang, tih lamah han pakai dawn ta ila. Report hrang hrang a alan danin, advance-in $ maktaduai 12.5 a dawng daih tawh a, $ maktaduai 15 dawng tura sawi erawh a pha lo. Mahse, heti zat advance a dawng tawh hrim hrim hi a namai tawh lo hle a ni.
Sum a lakluh hiau hiauna tur zawk erawh a lo thleng dawn chauh a, TMZ tarlan dan ah chuan Britney hian lehkhabu hralhna atanga 25% hi su faiin a dawng dawn tihna a ni a, chuti a nih chuan tlangzarh ni hnih khat lek chhung pawha copy 400,000 chuang hralhtu hian a lehpek zela lehkhabu hralhna atanga sum a lakluh tam dan tur sawiin a siak lo a ni ber mai.
Hetih lai hian, kum thar lamah ‘The Woman in Me’ volume II tichhuak tur anga sawi a riring nghal viau mai a, amah ngei pawh hian fiamthu ti tak deuhin social media kaltlangin volume 2-na in beisei thei ang, tih lam hawiin a ziak bawk.
A tak ram a thlenpui a nih ngat chuan Briney hian inpuanna danglam leh mi hriatchak tak tak a la neih nual rinna nen, volume 2 pawh hi hit viau tura ngaih a ni nghal der tawh.