Aizawl : MPCC President Lalsawta chuan kumin MLA inthlan chu thlarau indona a ni a, he inthlana an party innghahna chu Pathian a nih thu a sawi.
Inrinni zingkara Aizawl West III huam chhung, Maubawk Dawrkawna Congress party campaign office hawnna leh vantlang inkhawm buatsaihah he biala INC candidate ni bawk Lalsawta chuan, ram pawn atanga beihna chu a chhunga mite an tangrual thei a; mahse, a chhung atanga beihna erawh kehchhiatna a ni a, chu chu tuna India ram dinhmun a nih thu sawiin, “Hetianga kehchhe vek thei dinhmuna kan din chhan chu BJP in Hindu Lalram din an tum vang a ni,” a ti.
Lalsawta chuan BJP te hmalakna avangin ram pawn atanga tanpuina pawh dawn theih a nih tawh loh avangin, nasa takin kohhranin harsatna an tawk mek tih a sawi a. MNF in inneihna chu man inpek hian a tawk mai e tia ruahmanna an siam tlat chu kohhran dan thianghlim pawisak lohna niin, hei hi BJP an mawngzawm nghehzia latirtu a nih thu a sawi.
MLA inthlanpui lo awm turah Mizoram hmun hrang hrang atanga thu an dawn danin, Pathian leh mipuite zarah an sorkar ngei dawn tih a chiang thu sawiin, “Kan auhla tur pawh Pathianin min pe a, Kristian te dinhmun nekcheptu BJP hmanhmawh taka paihthlak a ngai. Kohhranin kan rinna vawnhmim a tulzia min zirtir a. Hei hi a taka kan hlenchhuah ngei hi Kohhran mipui te’n kan bat a ni,” tiin, enchhin tih vel mai maia inkhualtelem hun a nih tawh loh thu a sawi.
MPCC President chuan kumin MLA inthlanah Congress an sorkar chuan bial chhungah hmasawnna ngelnghet kalpui a nih bakah, cancer leh natna harsa zual bik vei inenkawlna la mekte tanpui nan kum tin budget-ah Rs. 5,00,00,000 an dah tur thu te, tar chawmna thla tin Rs 300 leh Rs 800 an dawn thin chu Rs 2000-ah tihsan a nih tur thu te, rualbanlo leh hmeithaite tan National Social Assistance Programme hnuaia thlatin Rs 400 an dawn chu Rs 2000-ah tihsan a nih tur thu a sawi bawk.