Aizawl : Union Cabinet Minister of Road Transport and Highway Nitin Gadkari chuan Mizoramah hmasawnna hrang hrang hmuh anih theihna’na pawimawh ber chu BJP sorkar a nih thu a sawi.
Thawhtannia BJP in West Phaileng Dinthar kawn a, Dampa bial BJP candidate Vanlalhmuaka, BJP State President ni mek campaign puiin vantlang inkhawmah Nitin Gadkari hian thu a sawi a. Mizoramah hmasawnna hrang hrang a awm theihna’n BJP an sorkar a ngai tih a sawi.
Nitin Gadkari chuan BJP in sorkarna an chang a nih chuan Mizorama sumdawng hrang hrangin hlawhtlinna an neih theih nan te, Aiport tha leh changtlung a neih theih nan te, rail kawng tha tak leh lo neitu, kuthnathawktute’n awmze neia an thlai tharte hralhna an neih theihna tur te, thalai eizawnna hna neilo te’n eizawnna hna an neihna turin BJP in hma an la dawn tih a sawi.
Union Cabinet minister chuan, “Mizoramah BJP in sorkarna a siam anih ngat chuan, central atangin kawng hrang hranga hmasawnna awm thei te chu a takin kan seng lut dawn a. Mirethei te tan hamthatna hrang hrang tam tak kan dawng thei dawn a ni,” a ti.
Vantlang inkhawm hi MPF Chairman Pastor Vanlalthlamuana’n a kai hruai a. Dampa bial BJP candidate Vanlalhmuaka leh Dr BD Chakma, MLA te’n thu an sawi a. Mamit bial BJP candidate Lalrinliana Sailo pawhin a tel pui bawk.