Aizawl: MZP General Headquarters hruaituten nimin khan Lunglei-a MZP Hqrs pisaah thu thar thehdarhtute an kawm a, MLA inthlanpui neih tura hnam dang pasal nei candidate vote lo tur leh, hnam dang pasal nei candidate-a dahtu party hnawl turin mipui an ngen.
MZP Gen. Hqrs President H Lalthianghlima chuan, December 19, 2022 khan political party tinte hnam dang pasal nei candidate-a dah lo tura an ngen hnuah, August 21, 2023 khan ngenna an thawn nawn leh vek tih sawiin, “Party thenkhat hotute pawh hmuh a ni bawk a. October 13, 2023 khan MZP Pisapui-ah thu thar thehdarhtute kawmin, candidate-a hnam dang pasal neite dah lo turin ngenna siam nawn leh a ni,” a ti.
H Lalthianghlima chuan, BJP leh ZPM ten hnam dang pasal nei candidate tura an ruat fel tawh pawh an ngenna avangin an thlak leh tih sawiin, “Congress-in thlak duh lova candidate an dah lui tlat chu pawi kan ti a. Kan hnam leh sakhaw zalenna an tlangaupui pawh hi thil inhmeh lo tak niin kan hria,” a ti.
MZP Gen. Hqrs President chuan, “Congress Party-in Lunglei South biala candidate tura an dah, Meriam L. Hrangchal pasal Dipen Zoliana chu, a pa chu Rajput hnam a ni a. A nu hi Kawlhmingliani (Gurkhali) niin hnam dang hlang hlak a ni,” tia sawiin, a intih-Mizo leh Mizo lohte, khawtlang tana an tangkai leh tangkai loh te, tribal certificate a neih leh neih lohte hi an buaina a nih loh thu leh, hnam dang dik tak a nih avangin a nupui chu Mizoram Assembly House-a thu turin Mizo hnam tan a him lo va. Tuna an hmalaknain awmzia a neih loh chuan hnam dang pasal neite kaltlangin ram rorelna chu hnam dang kutah a luh mai a hlauhawm tih a sawi.
Mizo hnam damna turin MZP chuan hnamdang pasal nei candidate hnawl a vote lo ngam turin Mizo mipuite a ngen tih sawiin H Lalthianghlima chuan, “Vawi tam tak kan ngen chunga hetiang mi candidate-a dah luitu party pawh MZP chuan tun inthlan lo awm turah hnawl ngam turin Mizo mipuite a ngen takzet a ni,” a ti.
Zawhna chhangin MZP hruaitute chuan, “Tun dinhmunah chuan Meriam L.Hrangchal hi a tlin a rinawm loh niin kan hria, a boruakte a inthlaka tling thei mai awm dinhmun a ding chho nih chuan bialah lut pheiin a tlin loh nan hma kan la zui zel dawn a ni,” an ti bawk.