Aizawl: Mizoram MLA inthlanpui neih tura chuhtu mi 174 zingah kum 41 leh 50 inkar candidate an tam ber a, ziak leh chhiar thiam lo pakhat a awm.
Association for Democratic Reforms (ADR) leh Mizoram Election Watch (MEW)-in candidate-te affidavit thehluh a zirchianna atanga lan danin MLA candidate zingah hian kum 31 leh 40 inkar hi mi 19 awmin, kum 41 leh 50 inkar candidate an tam ber a, 60 lai an tling a. Kum 51-60 hi mi 45 an ni a, kum 61 leh 70 inkara upa mi 42 an awm a. Kum 71 leh 80 inkar mi pariat an awm.
Candidate zinga upa ber chu Tuichang biala MNF candidate Tawnluia a ni a, kum 80-a upa a ni a. Aizawl East I-a MNF candidate Zoramthanga’n dawtin kum 79 a ni a, a pathumna chu Aizawl West III biala congress candidate Lalsawta a ni a, kum 77 a upa a ni.
A palina chu Aizawl North I biala MNF candidate R. Lalzirliana a ni a, pangana chu Aizawl North III biala INC candidate Lal Thanzara a ni.
Candidate zinga naupang ber chu Aizawl East I biala independent-a ding, Lalruatfeli Hlawndo leh Tuirial biala BJP candidate F. Vanhmingthanga te an ni a; anni pahnih hi kum 31 a upa ve ve an ni.
Aizawl South III biala a ZPM candidate Baryl Vanneihsangi leh South Tuipui biala ZPM candidate Jeje Lalpekhlua te hi kum 32 ve ve an ni a. Aizawl West III-a independent candidate Lalhrilzeli Hlawndo hi kum 33-a upa a ni bawk.
An zir san zawng an ziah lan danin, ziak leh chhiar thiam lo mi pakhat a awm a, pawl nga pass pathum, pawl riat pass 10, matric pass 12 an awm.
Pawl 12 pass 18 awmin, graduate 53 leh graduate professional 18 an awm a. Post graduate 45 bakah doctorate degree nei 12 leh diploma pahnih an awm bawk a ni.