ZPM Media & Publicity dept hotuten nimin khan Aizawl Press Club-ah thu thar thehdarhtute kawmin MNF sorkar chu an intiamna hrang hrangte an tihhlawhtlin loh avangin ram tana an hmachhawp leh thil tumte an sawi ngam tawh lo hial niin a sawi.
ZPM Media & Publicity GS Eddy Zosangliana Colney chuan, tun tum inthlana an elpui ber chu rorel lai MNF party an nih thu sawiin, “MNF hi party upa tawh tak, tawnhriat nei tha tawh, inthlan vawi tam tak lo paltlang tawh an ni a. Hetiang an ni chung hian, kumin hi an dan a dang a, an che buai em em mai a, aikaihtu eng emaw tak nei ang maiin an zeng tlat a ni ber,” a ti.
Eddy Zosangliana Colney chuan MNF party chu kum 2016 inthlan dawna nasa taka an aupui, an flagship programme SEDP-ah chhung tin hnena Rs nuai 3 sem an tiam chungin chhungkaw 60,000 vel hnenah Rs 25,000 den denin inthlan hma kum atangin an pe thei hram chauh a. An chhuanlam ber Covid-19 lah chhuanlam tling a nih lohzia mipuiin an hrethiam tawh tih a sawi.
MNF party-in traffic tihziaawmna atana kawng chhawng an sawi te pawh vawiin thlengin a ban pakhat pawh hmuh tur a la awm lo va. Leiverh an sawi te pawh sakuh kaw tiat takngial pawh an verh hmuh tur a la awm lo tih sawiin Eddy Zosangliana Colney chuan, “Mizoten mi rinawm kan tehna pakhat chu thutiama dingnghette hi a ni thin a, chuti ang zawnga kan teh dawn chuan kan sorkar thlah liam mek hi mahni thutiama ding nghet lo, veng khat pa daw thei leh rinawm lo an sawi ang mai an ni,” a ti.
Hun hmasa lam atang tawhin, Missionary nuai khat tirhchhuah tum a nih thu te, hmasawnna hnathawh tur a tam dawn avanga contractor sing rual mamawh tur thu te, Switzerland of the East-ah Mizoram siam tum a nih thu te, kum thum chhunga ei leh barah an intodelh tur thu leh vai buhfai rin tawh loh tur thu te, Mau chin a hlawk tur thu te, rua hmanga khawvel barakhaih tur thu te, traffic jam awm lohna khawpui a nih tur thu mipuite hrilhtu MNF party chu Mizoram mipui hian tute nge an nih an hrechiang tawh hle niin sawi bawk.
Eddy Zosangliana Colney chuan hun hmasa lama an lo khawsak tawh danah MNF chu an hlawhchham chian em avang leh, mipui min bum fin zawh tawh avangin, ram tana an hmachhawp te, ram tana a tih tumte pawh an sawi ngam tawh lo hial nia sawiin, “An sawi tur hre lovin ZPM leader beih chu hnapui berah an nei ta ringawt mai a ni,” tiin, MNF party chu an intiamna hrang hrangte hi tihlawhtling se, tun ang hian an khawsak a ngai lo ang a, anmahni tuhrah an sengin, anmahni thangah an awk a, an buai zo ta niin a sawi.